HAMAS tórt tutqynnyń denesin Qyzyl Krest uıymyna tapsyrdy

ASTANA. KAZINFORM – Qurbandar arasynda eki bala men olardyń anasy da bar, dep jazady VVS.

HAMAS bitim aıasynda Qyzyl Krest uıymyna tapsyrǵan tórt adamnyń denesi Izraılge jetkizildi. Olar 7 qazanda Izraıl tragedııasynyń sımvolyna aınalǵan sary shashty uldar Arıel men Kfır Bıbas, sondaı-aq olardyń anasy Shırı men 83 jastaǵy Oded Lıfshıts.

HAMAS Qyzyl Krest uıymyna tórt tabytty bergen. Olardyń árqaısysynda kepilge alynǵandardyń shaǵyn fotosýretteri bolǵan. Qyzyl Krest tabyttardy Gaza sektoryndaǵy TsAHAL kúshterine tapsyrǵan.

Máıitterdi qabyldaǵannan keıin Izraıl armııasynyń bas ravvıni qysqa rásim ótkizdi. Máıitter Izraıl týymen oralǵan tabyttarda elge jetkizilgen.

Izraıl máıitterdi anyqtaý úshin tekserý júrgizedi. Bul protsess 48 saǵatqa deıin sozylýy múmkin.

HAMAS Gaza sektoryndaǵy soǵys bastalǵannan beri alǵash ret tutqyndardyń máıitterin Izraılge tabystap jatyr.

Izraıl prezıdenti Itshak Hertsog jan táslim etkenderden keshirim surady. 

– Izraıl memleketi atynan basymdy ıip, keshirim suraımyn. Sol qorqynyshty kúni sizderdi qorǵaı almadym. Úıge aman-esen jetkizbegenim úshin keshirińizder, - dep jazdy ol X áleýmettik jelisinde.

Máıitterdi Qyzyl Krest uıymyna tapsyrar aldynda HAMAS kepilge alynǵandardyń Izraıl áýe shabýylynan qaza tapqanyn habarlady. Olar «kepildegilerdi qorǵaý» jáne «olardyń ómirin saqtap qalý úshin qoldan kelgenniń bárin jasaǵanyn» málimdegen.

Izraıl bul málimdemelerdi rastaǵan joq. Densaýlyq saqtaý mınıstri Ýrıel Býsso máıitterdi tekserý barysynda múmkindiginshe olardyń ólim sebebin de anyqtaıtynyn tilge tıek etti.

Eske sala keteıik, buǵan deıin HAMAS tórt tutqynnyń denesin Izraılge tabystaýǵa daıyndalyp jatqanyn habarlaǵan edik.