HAMAS sońǵy amerıkalyq tutqyndy bosatqysy keledi

ASTANA. KAZINFORM — HAMAS toby juma kúni Izraıl men AQSh-tyń qos azamattyǵy bar kepilge alynǵan adamdy bosatýǵa daıyn ekenin málimdedi, dep habarlaıdy BBC.

Bul tutqynda qalǵan sońǵy tiri amerıkalyq azamat bolýy kerek dep topshylandy. Sarapshylardyń pikirinshe, bul qadam arqyly HAMAS, eń aldymen, AQSh-qa atysty toqtatý týraly kelisimniń ekinshi kezeńin talqylaýǵa daıyn ekenin anyq kórsetip otyr.

Tutqyndaǵy adam — Nıý-Djersıde turatyn 21 jastaǵy Edan Aleksandr bolýy múmkin. Alaıda ol kepilgen alynǵan kezinde Izraıl armııasynyń qatarynda bolǵan kórinedi.

Sonymen qatar, 4 shetel azamatynyń denesi tapsyryldy, olardyń azamattyǵy anyqtalyp jatyr. 

Izraıl HAMAS-ty bitimgershilik kelissózderin keshiktirdi dep aıyptap, Gazadaǵy gýmanıtarlyq kómekke tosqaýyl qoıdy. Ol kepilge alynǵan barlyq adamdy bosatýdy kózdeıtin mámileniń ekinshi kezeńi bastalǵanǵa deıin tutqyndardy palestınalyq jazasyn óteýshilerge aıyrbastaýdy jáne TsAHAL-dy Gazadan shyǵarýdy talap etti.

AQSh 5 naýryzda HAMAS-pen kepilge alý jáne soǵysty toqtatý týraly tikeleı kelissózderdi bastady. Aleksandrdy bosatý AQSh-tyń arnaıy ókili Adam Belerdiń qatysýymen kelisildi.

Qarashadan bastap HAMAS 2000 palestınalyqtyń ornyna 33 ızraıldik pen 5 taı azamatyn bosatty.

Izraıl men HAMAS arasyndaǵy kelisim úsh kezeńdi qamtıdy. Olardyń birinshisi boıynsha kelisimge qol jetkizý úshin Qatarda deldaldardyń qatysýymen birneshe aı boıy kelissóz júrgizildi.

Ol 42 kún ishinde atysty toqtatýdy kózdeıdi:

• HAMAS kepilge alynǵan 33 ızraıldikti qaıtarady. Kelisimdegi bul top gýmanıtarlyq top dep atalady. Olarǵa balalar, áıelder, qarttar jáne densaýlyǵy syr bergen adamdar jatady.
• Izraıl 1900-ge jýyq palestınalyq tutqyndy bosatady.
• TsAHAL Gaza sektorynyń eldi mekenderinen shyǵady, biraq sektordyń shekaralas aýdandarynda, sonyń ishinde ońtústiginde Fıladelfııa dálizinde qalady. Bul jaǵdaıda Izraıl áskerleri Netsarım dálizinen - sektordy Soltústik pen ońtústikke bóletin mılıtarızatsııalanǵan aımaqtan ketýi kerek.
• Qonys aýdarǵan palestınalyqtar óz aýdandaryna orala bastaıdy.
• Gazaǵa kúnine júzdegen júk kóligi kóleminde gýmanıtarlyq kómek kele bastaıdy. 

Birinshi kezeń birqalypty ótken jaǵdaıda, ol kúshine engennen keıingi 16-shy kúni taraptar tómendegini kózdeıtin ekinshi kezeńdi kelisýge kóshýi tıis:

• Atysty tolyq toqtatý.
• Qalǵan ızraıldik kepilge alynǵan er adamdar men áskerı qyzmetshilerdiń palestınalyq tutqyndardyń ornyna aýystyrylýy.
• Izraıl áskerleri Gaza sektorynyń aýmaǵynan tolyǵymen shyǵady.

Kelisimniń úshinshi kezeńinde:

• Izraıl qaza bolǵan tutqyndardyń denelerin alady.
• Halyqaralyq donorlar Gaza sektoryn qalpyna keltirýge kirisedi.

Osyǵan deıin AQSh pen HAMAS 1997 jyldan beri alǵash ret tikeleı kelissózder júrgizetini habarlandy.