HAMAS Reseı azamatyn bosatty – RF SІM

HAMAS azat etilgen tutqyndardan bólek, reseılik bir azamatty bosatty. RF SІM resmı ókiliniń aıtýynsha, jaqynda ol jaqqa reseılik dıplomattar barady, dep habarlaıdy Kazinform TASS agenttigine silteme jasap.

Izraıl armııasynyń málimetinshe, HAMAS Qyzyl Krest uıymyna kepilge alynǵan 17 adamdy – 13 ızraıldik, 1 reseılik jáne 3 Taıland azamatyn tapsyrǵan.

Reseı tólqujaty bar kepilge alynǵan adam HAMAS-pen almasý tiziminen tys tikeleı kelisimder nátıjesinde bosatyldy, jaqyn arada reseılik dıplomattar bosatylǵan reseılikke barady. Bul týraly TASS agenttigine Reseı Syrtqy ister mınıstrliginiń resmı ókili Marııa Zaharova habarlady.

- Reseı dıplomattarynyń HAMAS-pen baılanysta bolǵan kepildegilerdi bosatýǵa baǵyttalǵan talpynystary óz nátıjesin berýde. Búgin Reseı tólqujatynyń ıesi bosatylyp, Qyzyl Krest uıymyna tapsyryldy. Reseı dıplomattary oǵan tez arada barady. Bul tutqyndardy bosatý týraly kelisim aıasyndaǵy tiziminen tys oryn aldy. Reseılik ókilder men HAMAS arasyndaǵy tikeleı baılanystar boldy. Bul jumys áli de jalǵasady», - dedi ol.

Zaharovanyń aıtýynsha, bosatylǵan reseılik - Ron Olegovıch Krıvoı.

Buǵan deıin HAMAS saıası bıýrosynyń basshysy Ismaıl Hanıeniń baspasóz hatshysy Taher ál-Nýný TASS agenttigine qozǵalys Reseı azamattyǵyn alǵan kepildi bosatyp, ony Halyqaralyq Qyzyl Krest komıtetiniń ókilderine tapsyrǵanyn málimdegen.

Qazan aıynyń sońynda Reseı prezıdentiniń Taıaý Shyǵys jáne Afrıka elderi boıynsha arnaıy ókili, Syrtqy ister mınıstriniń orynbasary Mıhaıl Bogdanov TASS agenttigine HAMAS qozǵalysy ókilderi Reseı Federatsııasynyń kepildegi segiz reseılikti bosatý týraly ótinishine jaýap berýge ýáde bergenin aıtty.