HAMAS ókilderi Egıpetke kelissóz júrgizýge bardy

ASTANA. KAZINFORM – Palestınalyq HAMAS qozǵalysy Gaza sektoryndaǵy soǵysty toqtatý jónindegi kelissózderdi jalǵastyrý úshin Egıpetke delegatsııa jibergenin rastady. Bul týraly uıymnyń Telegram-arnasynda habarlanyp, aqparatty TASS agenttigi taratty.

Habarlamada qozǵalys delegatsııasyn Gaza sektoryndaǵy HAMAS jetekshisi Halıl ál-Haııa bastap barǵany aıtylǵan. Sapar Egıpet tarapynan shaqyrý negizinde júzege asqan.

Kaırdegi kelissózder kezinde HAMAS ókilderi Egıpet pen Qatar deldaldarymen atysty toqtatý týraly kelisim múmkindikterin talqylamaq. Uıym Gazaǵa uzaqmerzimdi bitim, ızraıldik áskerdiń tolyq shyǵýy jáne tutqyn almasýǵa qatysty kez kelgen naqty usynysty oń qabyldaýǵa daıyn ekenin málimdedi.

Buǵan deıin Al Hadath telearnasy HAMAS delegatsııasy 12 sáýirde Egıpetke baratynyn habarlaǵan edi.

Sondaı-aq palestınalyq Maan agenttigi 18 sáýirde Kaırdiń jańa bastamasy týraly habarlady. Onda HAMAS-tyń 8–9 tutqyndy, sonyń ishinde qos azamattyǵy bar Iden Aleksandrdy bosatýy, sondaı-aq qaza tapqan 8 tutqynnyń denesin qaıtarýy usynylǵan. Óz kezeginde Izraıl 150-i ómir boıyna sottalǵandardy qosa alǵanda, birneshe júz palestınalyqty bosatýy tıis.

Bul kelisimge sáıkes 50 kúndik gýmanıtarlyq úzilis jarııalanyp, qajet bolǵan jaǵdaıda 70 kúnge deıin uzartylýy múmkin. Osy kezeńde taraptar janama kelissózderdiń ekinshi kezeńin bastaýǵa múmkindik alady.

Aıta keteıik, buǵan deıin Izraıl Lıvanǵa soqqy berip, HAMAS qolbasshysy qaza tapqanyn jazǵanbyz.