HAMAS qolyndaǵy tutqyndardyń 20-sy ǵana tiri bolýy múmkin
ASTANA. KAZINFORM — Gaza sektorynda HAMAS ustap otyrǵan tutqyndardyń ishinde tiri qalǵandarynyń sany 20 adamnan aspaýy múmkin. Olardyń qaza tapqany týraly rastalǵan derek joq. Bul týraly ızraıldik derekkózderge súıene otyryp TASS málim etti.
— 20 adamnan aspaıdy, olardyń ólimi týraly derek joq, — delingen habarlamada.
Izraıl tarapynyń sońǵy aqparatyna sáıkes, Gaza sektorynda tutqynda otyrǵandardyń arasynda Donbass týmasy Maksım Harkın de bar. Jalpy HAMAS-tyń qolynda tiri jáne qaza tapqan tutqyndardy qosqanda shamamen 50 adam qalǵan.
24 shildede Izraıl premer-mınıstri Bınıamın Netanıahý HAMAS-tyń Gaza sektoryndaǵy atysty toqtatý jónindegi usynysqa bergen jaýabyna baılanysty, 6 shildeden beri Dohada ótip jatqan kelissózderden delegatsııany keri qaıtarý týraly buıryq berdi.
Sońǵy bastamalar aıasynda kelisilgen 60 kúndik atysty toqtatý kezeńinde HAMAS Izraılge 10 tiri tutqyndy jáne Gazada qaza tapqan 18 adamnyń máıitin tapsyrýy tıis bolatyn. Óz kezeginde Izraıl sol kezeń ishinde uzaq merzimge sottalǵan 150 palestınalyqty jáne 2023 jylǵy qazan aıynda bastalǵan áskerı operatsııadan keıin Gaza sektorynda tutqyndalǵan 1 100-den astam adamdy túrmeden bosatýǵa mindetteler edi. Budan bólek, yqtımal kelisimge sáıkes, Gaza halqyna jetkiziletin gýmanıtarlyq kómek kólemi edáýir artatyn edi.
Buǵan deıin Ulybrıtanııanyń premer-mınıstri Kır Starmer Gazadaǵy jaǵdaıǵa baılanysty mınıstrler kabınetiniń shuǵyl otyrysyn shaqyrǵanyn jazdyq.
Gaza sektorynda ashtyqtan kóz jumǵandar sany 127 adamǵa jetti.