HAMAS gýmanıtarlyq úzilis týraly Izraıl usynysynan bas tartty
HAMAS uıymy soǵysty bir aptaǵa toqtatyp, onyń óteýi retinde 40 adamdy tutqynnan bosatý týraly Izraıl usynysynan bas tartty. Kazinform bul týraly Wall Street Journal-ǵa silteme jasap habarlaıdy.
Basylymnyń jazýynsha, áskerılerdiń qolbasshylyǵy soǵysty toqtatý týraly kelisim kúshine enbeıinshe, ızraıldik tutqyndardy qaıtarý máselesin talqylaýdan úzildi-kesildi bas tartyp otyr.
HAMAS-tyń sheshimin atalǵan toptyń saıası qanatynyń jetekshisi Ismaıl Hanııa egıpettik barlaýshylarmen kezdesýde aıtqan. Ol Kaırǵa oq atýdy toqtatý jáne Gaza sektoryna jetkiziletin gýmanıtarlyq kómek kólemin arttyrýdy kelisýge kelgenin atap ótken.
Eske salaıyq, 19 jeltoqsanda 80 eldiń elshileri men dıplomattary aldynda sóz sóılegen Izraıl prezıdenti Itshak Gertsog óz eli jańa bitimgerlik úzilis pen Gaza sektoryna qosymsha gýmanıtarlyq kómek jetkizý úshin HAMAS qozǵalysymen kelissózge ashyq ekenin málimdegen bolatyn.
Izraıl – Palestına shıelenisi
Bıylǵy 7 qazanda palestınalyq HAMAS uıymy Izraılge qarsy operatsııa bastady. Gaza sektorynan Izraılge qaraı myńdaǵan raketa ushyryldy, qarýlanǵan toptar ızraldik eldi mekenderge basyp kirdi. HAMAS bul operatsııa Shyǵys Ierýsalımde okkýpatsııalanǵan Ál-Aqsa meshitine jasalǵan shabýylǵa jáne ızraıldikterdiń palestınalyqtarǵa qarsy artyp kele jatqan zorlyq-zombylyǵyna jaýap ekenin aıtty.
Óz kezeginde Izraıl HAMAS-qa qarsy jaýapty operatsııa bastap, onyń sońy Gaza sektoryndaǵy halyqty jappaı qyrýǵa ulasty. 27 qazanda Izraıl Gazaǵa qurlyqtaǵy áskerimen soqqy jasaýǵa kóshti.
Búginde Gazanyń 2,3 mln turǵyny eksklavtyń tolyq qorshaýda qalýynan azyq-túlik, sý, dári-dármek tapshylyǵynan zardap shegip otyr. Myńdaǵan ǵımarat, sonyń ishinde aýrýhanalar, meshitter men shirkeýler zaqymdaldy nemese tolyǵymen qırady.
HAMAS pen Izraıl arasynda 24 qarasha kúni tańerteń kúshine engen «Gýmanıtarlyq úzilik» 1 jeltoqsanda tańerteń aıaqtaldy. Bul kúnderi eki tarap tutqynǵa alynǵan ondaǵan adammen almasty.
Bitim týraly ýaqytsha kelisim aıaqtalysymen Izraıl gazaǵa qarsy shabýylyn jalǵastyrdy.
Jeltoqsan aıynyń alǵashqy onkúndigindegi málimet boıynsha, Izraıldiń Gazaǵa shabýylynan 17,7 myń adam qaza tapty.
