HAMAS atysty toqtatý kelisimin oryndaýdy jalǵastyratynyn málimdedi

ASTANA. KAZINFORM — Palestınanyń ıslamdyq qarsylasý qozǵalysy (HAMAS) Gaza sektoryndaǵy atysty toqtatý, sonyń ishinde tutqyndarmen almasý kelisimin saqtaý nıetin rastady, dep habarlaıdy IRNA aqparat agenttigi. 

HAMAS málimdemesinde atap ótilgendeı, Gazadaǵy HAMAS uıymynyń tóraǵasy jáne kelissózder tobynyń basshysy «Halıl ál-Hıııa» bastaǵan qozǵalys delegatsııasy ásirese Izraıl rejıminiń júıeli túrde buzýynan keıin atysty toqtatý jáne tutqyn almasý kelisiminiń oryndalýyn talqylaý úshin deldardarmen kelissózder júrgizdi. 

HAMAS delegatsııasy Mysyr men Qatardaǵy kelissózder protsesine jaýapty tulǵalarmen, sondaı-aq kelisimniń tolyq oryndalýyn qadaǵalap otyrǵan deldardardyń tehnıkalyq toptarymen kezdesti.

Kezdesýler men talqylaýlarda kelisimniń barlyq erejesin saqtaý, ásirese halyqty baspanamen qamtamasyz etý, tez arada qurastyrmaly úıler, shatyrlar, aýyr tehnıkalar, medıtsınalyq maqsattaǵy buıymdar, janar-jaǵarmaımen shuǵyl qamtamasyz etý jáne gýmanıtarlyq kómekti jalǵastyrý, sondaı-aq kelisimde kórsetilgen basqa da barlyq tarmaqty saqtaý máseleleri talqylandy.

HAMAS-tyń atap ótýinshe, kelissózder oń atmosferada ótti. Mysyr men Qatardaǵy deldaldar kedergilerdi joıý jáne olqylyqtardy toltyrý úshin osy pýnktterdiń barlyǵynyń oryndalýyn qadaǵalaıtyndaryn basa aıtty. 

Eske sala ketsek, dúısenbi kúni palestınalyq HAMAS toby senbige josparlanǵan ızraıldik kepilge alynǵandardy bosatýdy belgisiz merzimge keıinge shegeretinin málimdegen bolatyn.

Keıinnen Izraıl HAMAS-tyń tutqyndardy bosatýdy toqtatý týraly málimdemesine jaýap berdi. 

Izraıl premer-mınıstri Bınıamın Netanıahý eger HAMAS senbi kúni túske deıin kepilge alynǵandardy qaıtarmasa, Izraıl armııasy Gaza sektoryndaǵy áskerı operatsııalaryn qaıta bastaıtynyn málimdedi.