HAMAS 625 palestınalyq tutqynǵa aıyrbas retinde Izraılge 4 adamnyń máıitin berdi

ASTANA. KAZINFORM — HAMAS sársenbi kúni kepilge alynǵan 4 ızraıldiktiń máıitin tapsyrdy, dep habarlaıdy VVS.

Buǵan jaýap retinde Izraıl 625 palestınalyq tutqyndy bosatady.

Tsahı Idan, Ohad ıAholomı, Itshak Elgart jáne Shlomo Mansýrdyń máıiti elge oralady. Qurbandardyń aty-jóni Izraıl sot-medıtsınalyq saraptamasynan keıin ǵana resmı túrde jarııalanady. 

Izraıl bosatqan tutqyndardyń alǵashqy toby Iordan ózeniniń batys jaǵalaýyndaǵy Ramalla qalasyna jetkizildi. 

Izraıl HAMAS-tyń bir mezgilde aıyrbastaý týraly málimdemesine qaramastan, palestınalyq tutqyndardyń tórt ızraıldik máıittiń kim ekeni anyqtalǵannan keıin ǵana tapsyrylatynyn, bul protsess kóp saǵatqa sozylýy múmkin ekenin aıtty.

Izraıl men HAMAS arasyndaǵy soǵysty toqtatý kelisiminiń birinshi kezeńi 19 qańtarda kúshine engennen beri Palestına toby ár joly qalyń kópshiliktiń kózinshe 25-ten astam tiri tutqyndy bosatqan. 

Izraıl HAMAS-ty «kepildegilerdi úgit-nasıhat maqsatynda qoldandy» dep aıyptady. 

Tiri shyqqan tutqyndar toptyń banneriniń fonynda májbúrli túrde sýretke túsip, kópshilikke qol bulǵady. Al, ótken aptada qaıtarylǵan tórt máıit tabyttarymen plakattardyń fonynda kópshilikke kórsetildi. 

BUU Izraıl talaptaryn maquldap, HAMAS-tyń áreketi halyqaralyq quqyqqa qaıshy ekenin moıyndady, óıtkeni kepilge berý qurmetsiz túrde júzege asyryldy.

Buǵan deıin HAMAS tórt tutqynnyń denesin Qyzyl Krest uıymyna tapsyrǵanyn habarlaǵan edik.