Halyqtyń psıhıkalyq densaýlyǵyn saqtaý úshin qandaı sharalar qolǵa alynǵan

NUR-SULTAN. QazAqparat - QR Densaýlyq saqtaý mınıstrligi psıhıkalyq densaýlyqty qorǵaý qyzmetin damytý boıynsha keshendi sharalardy iske asyryp jatyr, dep habarlaıdy QazAqparat.

Búginde elimizde psıhıkalyq densaýlyǵynda aqaý bar adamdarǵa statsıonarlyq deńgeıdegi 17 psıhıkalyq densaýlyq ortalyǵy, qalalyq emhanalar qurylymyndaǵy 86 bastapqy psıhıkalyq densaýlyq ortalyǵy, ortalyq aýdandyq aýrýhanalar janyndaǵy 204 psıhıkalyq densaýlyq kabıneti medıtsınalyq-áleýmettik kómek kórsetedi.

Bul rette psıhıatr-narkolog dárigerlerde, onyń ishinde alkogol men esirtkini paıdalaný saldarynan dınamıkalyq baqylaýda turǵan patsıentter úshin medıtsınalyq-áleýmettik ońaltý (MÁO) damyp keledi.

Aıta ketetin jaıt, medıtsınalyq-áleýmettik ońaltý - bul jumysqa tartý, otbasylyq jáne qoǵamdyq ómirge engizý úshin medıtsınalyq, áleýmettik jáne eńbek is-sharalaryn paıdalana otyryp, densaýlyqty qalpyna keltirý jónindegi sharalar kesheni.

Patsıentterdi ońaltý jeke ońaltý baǵdarlamasyna sáıkes júrgiziledi, ony dárigerler men psıhıkalyq densaýlyq salasyndaǵy basqa da mamandar ázirleıdi jáne júrgizedi jáne psıhoqurylymdy, psıhoterapııany, psıhologııalyq túzetýdi, saýyqtyrý jáne sport sabaqtaryn, orta terapııasyn, eńbekti, trenıngterdi, abılıtatsııany, ergoterapııany jáne t. b. qamtıdy.

El boıynsha naýqastarǵa MÁO kórsetý úshin 11 ońaltý bólimshesinde 609 ońaltý tósegi jumys isteıdi.