Halyqtyń 85% aǵylshyn tilinde sabaq berýdi qoldady - Erlan Saǵadıev

ASTANA. QazAqparat - QR Bilim jáne ǵylym mınıstri Erlan Saǵadıev 10-11 synyptarda tórt pándi aǵylshyn tilinde oqytýǵa daıyndyq jumystary jóninde baıandady, dep habarlaıdy QazAqparat tilshisi.

Bul Memleket basshysy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynda berilgen tapsyrma edi.  

"10-11 synyptarda 4 pándi aǵylshyn tilinde oqytý úshin oqýlyqtardy, metodıkalyq keshendi daıyndaý, ekspertıza jasaý jáne aprobatsııalaý, muǵalimderdiń daıyndyǵyn arttyrý syndy jumystary júrip jatyr. Jáne bul másele boıynsha ata-analarmen, muǵalimdermen, mektep dırektorlarymen talqylaýdy jalǵastyramyz. Sebebi, bizge daıyndyqty naqty túsiný qajet. Birneshe ózgerister bolady, ony oqý jylynyń aıaǵynda búkil qoǵamǵa jetkizemiz, - dedi E. Saǵadıev QR BǴM alqasynyń keńeıtilgen otyrysynda.

Mınıstrdiń aıtýynsha, joǵary synypta keı pánderdi aǵylshyn tilinde ótýge halyqtyń basym bóligi oń qabaq tanytyp otyr.

«Qazirgi eriktilik prıntsıpi oń yqpalyn tıgizip otyr. Elimizde 12 myńnan astam muǵalimder aǵylshyn tiliniń A2 deńgeıinen V2 deńgeıine ótý úshin erikti kýrstarǵa jazyldy. Bul - bizge qajetti muǵalimderdiń jartysy. Olar ótken jyldan beri oqyp keledi. Kóptegen dırektorlar osy tásildi durys dep sanaıdy, ıaǵnı eshkimdi til oqýǵa májbúrlemeý kerek. Al oqyǵysy kelgenderge - bar jaǵdaıdy jasaý kerek. Halyqtyń 85 protsenti - muǵalimder, ata-analar men balalar birqatar pánderdiń aǵylshyn tilinde júrgizilgenin qalaıdy. Sondyqtan, muny tıimdi paıdalaný kerek", - dep óz sózin túıindedi mınıstr.