Halyqaralyq tórelik ortalyǵynda 431 is tirkeldi
Dúnıejúzilik bank pen Ádilet mınıstrligi «Daýlardy sheshý jáne aldyn-alý tetikterin jetildirý» taqyrybynda vebınar ótkizip jatyr. Atalmysh sharada sóz alǵan Ádilet mınıstri Marat Beketaev «Astana» qarjy ortalyǵy óńirdegi ınvestıtsııalyq daýlardy sheshýge belsendi atsalysyp otyrǵanyn atady.
«Qazaqstan otandyq jáne sheteldik ınvestorlarǵa eń qolaıly jaǵdaı jasaýǵa daıyn. «Astana» halyqaralyq qarjy ortalyǵyn qurý – sonyń dáleli. AHQO-nyń jeke soty jáne halyqaralyq tórelik ortalyǵy bar. Bul organ aǵylshyn quqyǵynyń normalary men qaǵıdattaryna negizdelgen Ortalyq Azııadaǵy tuńǵysh júıe ekenin aıtý kerek. ıAǵnı, azamattyq jáne kommertsııalyq daýlardy sheshý úshin eń joǵary halyqaralyq standarttar boıynsha jumys isteıdi. Halyqaralyq tórelik ortalyǵy sot talqylaýlaryna táýelsiz, únemdi jáne jyldam balama usynady. Búgingde ortalyqqa tórelik jáne deldaldyq kómek suraǵan 431 is tirkelgen. Biz ozyq halyqaralyq tájirıbe boıynsha quqyqtyq bazamyzdy jetildire túsemiz», - dedi Ádilet mınıstri.
Vebınarǵa Dúnıejúzilik banktiń Qazaqstan boıynsha óńirlik menedjeri Jan Fransýa Marto, Dúnıejúzilik banktiń vıtse-prezıdenti, Investıtsııalyq daýlardy retteý jónindegi halyqaralyq ortalyqtyń bas hatshysy Meg Kınner, Halyqaralyq ınvestıtsııalyq jáne saýda quqyǵy professory Kaı Hober-Ýpsala, Vena ýnıversıtetiniń Halyqaralyq jáne Eýropalyq quqyq professory Avgýst Reınısh jáne basqa da sarapshylar qatysyp jatyr.
Marat Beketaevtyń sózine qaraǵanda, bul – Qazaqstandaǵy sot tóreligi sektoryn reformalaýǵa arnalǵan úshinshi vebınar.
«Búgingi sessııada daýlardy sheshýdiń balama qyrlary talqylanady. Atap aıtqanda, daýlardyń aldyn alý, tórelik jáne medıatsııa týraly sóz qozǵaımyz. Qazaqstan árqashan daýlardy sheshýdiń eń jaqsy tetikterin qalyptastyrýǵa jáne saqtaýǵa umtylyp keledi. 2016 jyly biz «Arbıtraj týraly» Zań qabyldadyq. Zańnyń erejeleri 1985 jylǵy Halyqaralyq saýda tóreligi týraly úlgilik zańǵa, 1958 jyly Nıý-Iorkte qabyldanǵan sheteldik tórelik sheshimderdi taný jáne oryndaý týraly konventsııaǵa jáne 1961 jylǵy Halyqaralyq tórelik týraly Eýropalyq konventsııaǵa sáıkestendirildi», - dedi vedomstvo basshysy.
