«Halyq úni» áleýmettik jobasyn júzege asyrý baǵyty túsindirildi
«Aqparat jáne qoǵamdyq damý mınıstrligi elimizdegi azamattyq bastamalardy memlekettik turǵyda qoldap kele jatqan basty úılestirýshi memlekettik organda. Bul rette barlyq mindetterimiz úkimettik emes uıymdarmen tikeleı qarym-qatynasta sheship, qoǵam belsendilerimen birge atqarylady. Azamattyq qoǵamdy damytý kontseptsııasy qabyldanǵaly beri bul baǵytta orasan zor jumys iske asyryldy. Dese de búgingi jaǵdaıda jeńisterimizben birge jetpegen tustarymyzdy da aıta otyrý kerek. Máselen, elimizde túrli áleýmettik máselelermen aınalysatyn 22 myńnan astam úkimettik emes uıym tirkelgen. Biraq naqty isterdiń basynda belsendilik kórsetip júrgenderdiń sany 5 myńnan aspaıdy. Bul degenimiz, qanshama bastama men áleýmettik másele óz belsendisin tappaı júrgendi bildiredi», - dedi vıtse-mınıstr Ortalyq kommýnıkatsııalar qyzmetinde.
Osy oraıda kóptegen elde áleýmettik máseleler úkimettik emes uıymdardyń, azamattyq belsendilerdiń enshisine berilgenin eske saldy.
«Sondyqtan Aqparat jáne qoǵamdyq damý mınıstrliginiń tikeleı qoldaýymen, QR Prezıdentiniń janyndaǵy Ulttyq qoǵamdyq senim keńesiniń múshesi, quqyq qorǵaýshy Aıman Omarovanyń bastamasymen jáne «Altyn Qyran Foundation» qaıyrymdylyq qorymen áriptestikte «Halyq úni» áleýmettik jobasy usynylyp otyr. Bul joba úshjaqty áriptestiktiń birigeı kórinisi, aýyldardaǵy qarapaıym adamdardyń máselelerin sheshýdiń, osy arqyly Memleket basshysy jarııalaǵan «Halyq únine qulaq asatyn memleket» qaǵıdasynyń is barysynda oryndalýynyń birden bir úlgisi bolady degen úmittemiz», - dedi Bolat Tilepov.
Onyń paıymynsha, osyndaı ıgi isterge kásipkerlerdiń aralasyp, áriptes bolýynyń mańyzy zor.
Óz kezeginde quqyq qorǵaýshy Aıman Omarova atalǵan jobanyń qalaı paıda bolǵanyn túsindirdi.
«Qarapaıym halyqtyń arasynda júrip, tynys-tirshiligin tarazylaý barysynda keıbir adamdardyń quqyqtyq saýaty tómen ekenin baıqadym. Saldarynan qurǵaq jerde súrinip, bolmashy dúnıeden búgilip, taǵdyr taýqymetin tartýda. Ásirese, bıýrokrattyq kedergi saldarynan memlekettik baǵdarlamalarǵa qatysa almaı qınalýda. Bul turǵyda maqsatym bireý – halyqpen kedergisiz baınalys ornatý ári azamattardyń memlekettik organdardyń qyzmetine senimin arttyrý», - dedi ol.
A. Omarovanyń aıtýynsha, «Halyq úni» jobasyn ázirleý barysynda negizgi alty mindet qoıyldy. Osy oraıda bılik pen buqara arasyndaǵy yntymaqtastyq baılanysty nyǵaıtý, memlekettik qyzmetter men áleýmettik tólemderdi alý tártibin turǵyndarǵa keninen túsindirý, áleýmettik ál-aýqatyn arttyrý maqsatynda júzege asyp jatqan memlekettik saıasatty jan-jaqty túsindirý, shalǵaı aımaq turǵyndarynyń quqyqtyq aqparattandyrý jumysyn jetildirý, halyq arasyndaǵy túrli áleýmettik máselelerdi taldap tarazylap, monıtorıng jasaý, sondaı-aq memlekettik organ jumysynyń ashyqtyǵyn qamtamasyz etý arqyly halyqpen udaıy keri baılanys ornatý maqsattary qamtylǵan.
«Sondyqtan biz «Halyq úni» jobasy negizinde turǵyndarǵa áleýmettik jeli arqyly jáne tikeleı jaqyndaý jolyn izdeımiz. Áleýmettik jelilerde kestege sáıkes belgilengen ýaqytta tikeleı efırler ótkizý, taqyryptyq beıne rolıkter kórsetý arqyly turǵyndardyń quqyqtyq saýattylyǵyn kóterýdi jón dep sanaımyz», - dedi quqyq qorǵaýshy.
