Halyk Bank-ke Qazkom-nyń qosylýy: Klıentterde qandaı kúdik boldy

ASTANA.QazAqparat - Halyk Bank basqarma tóraǵasynyń orynbasary  Nurlan Jaǵyparov eki banktiń birigýine qatysty Qazkom klıentteriniń is-qımyly týraly aıtyp berdi, dep habarlaıdy QazAqparat.

Onyń sózine qaraǵanda, bólimshelerde qolma qol aqshany alý men tolyqtyrý sharalary Halyk Bank-ke Qazkom-nyń qosylǵanǵa deıingi burynǵy deńgeıinde jalǵasyp jatyr.

«Bankomattarda aqshany sheship alý boıynsha óte tómen belsendilik baıqalýda. Biz bastapqyda aqsha aınalymy eleýli túrde artady dep oılaǵan edik, sondyqtan barynsha bankomattardy tolyqtyryp otyrdyq. Sonymen qatar, adamdardyń kóbisi bólimshelerge kelip, esep-shot jaǵdaıy boıynsha anyqtama alyp, qarjy qaldyqtaryn tekserip jatyr. Almatyda 40-tan astam túrli bólimshe bar, onyń 10-nynda turǵyndar kezekte tur. Adamdarda alańdaýly, sondyqtan aqsha qaldyqtaryn tekserýge tyrysýda», - dedi N. Jaǵyparov.

Osy oraıda basqarma tóraǵasynyń orynbasary bank klıentterin qarjynyń tolyq kólemde saqtalatyndyǵyna senimdi bolýǵa shaqyrdy.

Onyń atap ótýinshe, Qazkom reıtıngi joǵary senimdi bankke qosyldy. Sonymen birge, endi bankomattardyń, POS-termınaldardyń sany artyp, elimiz boıynsha 640-tan astam bólimsheler jumys isteıtin bolady.

«Belgili bir merzimde ınternet-bankıngte qıyndyqtar boldy. Qazirgi kezde onyń jumysyn turaqtandyrdyq. Biz eń qıyn kezeńnen óttik. Osy aptanyń sońyna qaraı barlyq jumystar qalypty rejimde iske asyrylady dep oılaımyn», - dep qosty Jaǵyparov.

Budan buryn habarlanǵandaı, jaqynda Qazkom men Halyk Bank-tiń qosylý protsesi aıaqtaldy.