Halqymyz qıyn-qystaý synaq jyldarynda qamyqqan janǵa qamqor boldy - Bas múftı
«Elimizde shýaqty kóktemniń alǵashqy kúni alǵys aıtý merekesimen bastalady. Barshańyzdy birlik pen meıirimge úndeıtin merekemiz – Alǵys aıtý kúnimen shyn júrekten quttyqtaımyn. Ár otbasyǵa qut-bereke, baqyt pen tabys tileımin. Adamgershilik pen ımandylyqty ómiriniń qazyǵy etken halqymyz qıyn-qystaý synaq jyldarynda qamyqqan janǵa qamqor boldy», - dedi QMDB tóraǵasy vıdeoúndeýde.
Osy oraıda Bas múftı taǵdyr taýqymetin tartyp, zobalań zamandarda qazaq jerine pana izdep kelgen túrli ult pen din ókilderin baýyryna basyp, barymen bólisken ata-babalarymyzdyń bul jaqsylyǵy urpaq úshin máńgi ónege ekenin atap ótti.
«Endeshe, jaqsylyqty jadymyzdan shyǵarmaý – adamdyq is... Jaqsylyqqa jaqsylyqpen jaýap berý – Paıǵambarymyzdyń (oǵan Allanyń salaýaty men sálemi bolsyn) ónegeli amaldarynyń biri ekenin anyq ańǵaramyz. Óıtkeni hadısterdiń birinde: «Kim adamdarǵa (jaqsylyqtaryna) alǵys bildirmese, Allaǵa shúkirlik etpegeni» delingen», - dedi Naýryzbaı qajy Taǵanuly.
«Ulanǵaıyr jerimizdi qorǵap, bizge amanat etip qaldyrǵan babalarymyzǵa, meıirimin tógip, sábı kezimizden mápelep ósirgen ata-anamyzǵa, qamqor bolǵan aǵaıyn-týysqa alǵys aıtamyz. Men osy rette syndarly sátte halyqqa qamqor bolǵan el qamyndaǵy azamattarǵa, dárigerlerge, Qazaqstan musylmandary dinı basqarmasynyń ıgi bastamalaryna, qaıyrymdylyq aktsııalaryna qoldaý kórsetken jomart jandarǵa aıryqsha alǵysymdy bildiremin. Sondaı-aq dinı rásimderge shekteý qoıylǵan sátte bir úıdiń balasyndaı birligin tanytqan jamaǵatqa rııasyz rızalyq nıetimdi jetkizemin. Barshańyzǵa myń alǵys! Alla Taǵala elimiz ben jerimizdi túrli synaqtan saqtap, halqymyzdy aman etkeı. Denimiz qýatty, ár kúnimiz shýaqty bolǵaı! Ámın!», - dedi QMDB tóraǵasy.
