Halyqtyń qoldaýy qatty sezildi – Kókparshylar kapıtanymen suhbat
ASTANA. KAZINFORM – Búgin Qazaqstan men Qyrǵyzstan arasyndaǵy Kókparda sońǵy mınýttarda tarıhı jeńis syılaǵan qurama kapıtany Qurmanbek Turǵanbek oıyn týraly óz pikirin aıtty.
«Fınaldyq oıyn óte tartysty ótti. Eki taımda 40 mınýt boıy toqtamaı shaptyq. Sońǵy sekýndta qolymyzǵa serke tıgende basqasha sezim boldy. Ony ári qaraı júzege asyrmasam – maǵan syn bolar edi. Ózderińiz kórgendeı, qosymsha 10 mınýtta «altyn salym» salyp, komandaǵa jeńis ákeldim. Negizi 4-shi dúnıjúzilik kóshpendiler oıynynda da dál osylaı altyn salym salǵan edim. Oıyn barysy óte qyzyq boldy. Qyrǵyz baýyrlarymyzǵa jaqsy qarsylas bolǵany kóp raqmet aıtamyn. Elimizdiń, jerimizdiń, halqymyzdyń qoldaýy qatty sezildi. Bári Qyrǵyzstan men Qazaqstannyń esebi 3-1 bolǵanda qatty qoryqtyq dep jatyr, oǵan biz daıyn boldyq. Qandaı jaǵdaı bolsa da jeńisti julyp alamyz dedik, sol maqsatymyzǵa jettik, - deıdi Qurmanbek Turǵanbek agenttik tilshisine bergen suhbatynda.
Qurama kapıtany 1997 jyly Jambyl oblysynda týǵan. Ol bala kúninen atqa minip óskenin aıtty.
«Ákem jaǵynan da, anam jaǵynan da kókpar shapqan týystarym bar. Olar áli kúnge deıin attan túsken joq, tipti ulttyq quramaǵa da engen. Bul endi qazaqtyń boıynda bar nárse dep oılaımyn, qandaǵy nárse shyqpaı qoımaıdy. Keıin urpaqtarymyz da kókpar shapsa, qýanamyz», - deıdi spıker.
Kókparda birinshi taımda serkege talas kezinde eki eldiń kókparshylary qaqtyǵysyp, oıyn ýaqytsha toqtaǵan bolatyn.
«Qyrǵyz baýyrlarymyz jeńip turǵan sátte qatty emotsııaǵa berilip ketti ǵoı deımin. Bizdiń palýanǵa balaǵat sóz aıtypty. Sol sebepti Ulan aǵamyz ashýǵa boı aldyrdy. Oıyn tártibin buzǵan qyrǵyz oıynshysy óz jazasyn aldy. Al bizdiń tarapymyzdan anaý aıtqandaı eshteńe bolǵan joq», - dedi Q. Turǵanbek.
Buǵan deıin Kazinform agenttigi jeńimpaz bolǵan qazaq kókparshylary qansha syıaqy alatynyn habarlaǵan edi.
«Bul jerde aqsha úshin emes, namys úshin oınadyq. Elimizdiń namysyn qorǵap, kók Týdy jelbiretý úshin osynshama ýaqyt jumsadyq, tórt aı daıyndyqta jattyq. Qazaq sportyna paıdamyzdy tıgizsek, sol biz úshin eń joǵarǵy baǵa dep bilemiz», - deıdi kókparshy.
Esterińizge sala keteıik, Astanada ótip jatqan Dúnıejúzilik kóshpendiler oıyndarynda kókpardan Qazaqstan quramasy Qyrǵyzstan komandasyn jeńdi.
