Halyqqa beriletin kredıtter ósip keledi – Ulttyq bank

ASTANA. KAZINFORM – QR Ulttyq bankiniń tóraǵasy Tımýr Súleımenov halyqqa beriletin kredıtter artqanyn, ásirese tutynýshylyq kredıtter 34,5%-ke óskenin aıtyp otyr.

− Halyqqa beriletin kredıtter ósip keledi. Onyń ósimi 24,4% qurady. Onyń ishinde tutynýshylyq kredıtter 34,5%-ke ósti. Halyqtyń shamadan tys bereshegin boldyrmaý úshin qarjy retteýshileriniń, Úkimet pen Parlamenttiń ortaq bastamasymen zań qabyldandy. Merzimi ótken bereshegi bar azamattarǵa kredıt berýge tyıym salyndy. Qaryzdardy kollektorlarǵa berýge eki jyldyq moratorıı engizildi. Tutynýshylyq qaryzdardyń eń joǵary somasy belgilendi. Qaryz alýshynyń boryshyn shekteıtin jańa normatıv engizildi, − dedi Ulttyq bank tóraǵasy Memleket basshysynyń qatysýymen ótken Úkimettiń keńeıtilgen otyrysynda.

Degenmen, spıker tutynýshylyq kredıtteýdiń qarqyny áli de joǵary ekenin atap ótti.

− Naryqtyń damýyn jáne halyqtyń kredıttik júktemesiniń ósýin qosymsha rettegen jón dep sanaımyz. Osyǵan oraı bıyl Qarjy naryǵyn retteý agenttigimen birlesip jeke tulǵalardy kredıtteý segmentinde kapıtaldyń kontrtsıkldik býferin qoldaný máselesin jáne basqa da sharalardy ázirleımiz, - dedi T.Súleımenov.

Buǵan deıin Prezıdent Qasym-Jomart Toqaev halyqty ulttyq valıýtanyń qubylmalylyǵy alańdatyp otyrǵanyn, Ulttyq bank jumysyna áli de suraqtar baryn aıtqan edi.