Halyqaralyq týrızm ýnıversıteti dýaldy bilim berý júıesine kóshedi

ASTANA. KAZINFORM – QR Halyqaralyq týrızm jáne meımandostyq ýnıversıteti dýaldy bilim berý júıesine kóshpek. Bul týraly atalǵan ýnıversıtet rektory Álibek Shoqparov málim etti.

«Túlekter quzyrettiliginiń bolmaýy máselesiniń birden-bir durys sheshimi - oqý protsesin tájirıbege baǵdarlaý. Sondyqtan 2024 jyldan bastap elimizdegi Halyqaralyq týrızm jáne meımandostyq ýnıversıteti 50%-de 50%-ǵa dýaldy bilim berý júıesine kóshýdi josparlap otyr», - dedi Álibek Shoqparov elordada ótken Týrızm jáne sport mınıstrliginiń keńeıtilgen alqa otyrysynda.

Onyń aıtýynsha, týrızm salasyndaǵy eńbek naryǵynda mamandardy akademııalyq dárejesine emes, daǵdysyna qaraı irikteý tásili qoldanylady.

«Sondaı-aq, sala mamandaryn qaıta daıarlaý máselesi ótkir tur. Zamanaýı joǵary bilim berý júıesindegi negizgi bilim berý ınnovatsııasy – mamandardy qysqa merzimde daıarlaý nemese qaıta daıarlaý. Bul eńbek naryǵyn qajetti ári quzyreti bar mamandarmen qamtamasyz etýge jáne qolda bar eńbek resýrstardyń biliktiligin qaıta arttyrýǵa múmkindik beredi», - deıdi JOO basshysy.

Ýnıversıtet basshysy keltirgen derekterge súıensek, búginde elimizde 42 joǵary oqý orny jyl saıyn 1500-den astam týrızm salasy kadrlaryn daıarlap shyǵarady. Dese de túlekterdiń ósý qarqynyna qaramastan, týrızm ındýstrııasy sektory úshin qajetti daǵdylary bar mamandarǵa tapshylyq bar.