Halyqaralyq Olımpıadalyq komıtetke jańa prezıdent saılandy
ASTANA. KAZINFORM – 23 maýsym kúni, Halyqaralyq Olımpıada kúninde, Lozanna qalasyndaǵy Olımpıada úıinde Halyqaralyq Olımpıadalyq komıteti (HOK) prezıdentiniń ókilettigin tabystaý rásimi ótti. 2013 jyldan beri HOK-ty basqarǵan Tomas Bah óz ókilettigin resmı túrde Zımbabveden shyqqan júzýden eki dúrkin Olımpıada chempıony Kırstı Koventrıge tapsyrdy. Jańa prezıdent tún ortasynda óz qyzmetine resmı kirisedi. Bul týraly QR Ulttyq olımpıada komıteti habarlady.
Koventrı HOK-tyń tarıhyndaǵy onynshy prezıdent jáne alǵashqy áıel, sondaı-aq bul laýazymǵa taǵaıyndalǵan Afrıka qurlyǵynyń alǵashqy ókili atandy. Ol bıyl naýryz aıynda Grekııanyń Olımpııa qalasynda ótken HOK-tyń 144-sessııasynda segiz jyl merzimge saılanǵan bolatyn.
Saltanatty rásim barysynda Tomas Bah Olımpıada úıiniń kiltin Koventrıge saltanatty túrde tabys etti. Bul HOK-taǵy basshylyqtyń aýysýyn bildiretin dástúr. Kiltti 1992 jylǵy Barselona Olımpıadasynyń alaýyn jasaǵan ıspan dızaıneri Andre Rıkar ázirlegen. Sharaǵa HOK músheleri, sportshylar, qoǵam qaıratkerleri men halyqaralyq seriktester sııaqty 700-den astam qonaq qatysty.
Semserlesýden Olımpıada chempıony, HOK-tyń toǵyzynshy prezıdenti Tomas Bah uıymnyń eń joǵary marapaty – Altyn Olımpıadalyq ordenimen marapattaldy. Qoshtasý sózinde ol áriptesterine alǵys bildirip, óz sheshiminiń mańyzyn atap ótti.
– Jańa kezeń jańa kóshbasshylyqty talap etedi. Kırstı Koventrı – ómiri olımpıadalyq qundylyqtarmen bite qaınasqan tulǵa. Ol uıymǵa jańa ún men tyń kózqaras ákeledi. Bul bolashaq úshin asa mańyzdy, – dedi Bah.
Koventrı óz sózinde Bahqa 12 jyldyq eńbegi úshin, Olımpıadalyq qaýymdastyqtaǵy birlik pen qoldaý úshin alǵysyn bildirdi.
– Siz bizge «birlik» ıdeıasyna negizdelgen mura qaldyrdyńyz. Biz bul muramen maqtana alamyz dep senemin. Eń qıyn kezeńderde de siz qundylyqtarǵa adal boldyńyz. Sizge alǵysym sheksiz, - dedi ol.
Ol sondaı-aq sportshylar komıssııasynyń múshesi retinde Bahpen alǵashqy kezdesýi, bapkeri men otbasynyń sporttaǵy jolyndaǵy mańyzy jáne balalardyń oǵan Olımpıadalyq qozǵalystyń mánin eske salyp otyratyny jaıynda da aıtty.
– Olımpıadalyq qozǵalys – jaı ǵana sporttyq shara emes. Bul – shabyt beretin, ómirdi ózgertetin jáne úmit syılaıtyn alań. Bólingen álemde ol – biriktirýshi kúsh bola alady, - dedi.
Koventrı barsha qaýymdy birlesip jumys isteýge shaqyrdy.
– Bizdiń ekojúıemiz órmekshiniń toryndaı kúrdeli, biraq biz birlikti saqtasaq, ol qýatty bola beredi. Árkimniń óz róli bar. Tek birlese otyryp qana biz jańa býyndy shabyttandyryp, armandardyń oryndalýyna jol asha alamyz, – dep túıindedi jańa prezıdent.
Rásim aldynda Kırstı Koventrı men Tomas Bah zamanaýı Olımpıada oıyndarynyń negizin qalaýshy Per de Kýbertenniń zıratyna baryp, onyń qurmetine gúl shoǵyn qoıdy.
Aıta keteıik, Grekııanyń Kosta-Navarıno qalasynda ótken Halyqaralyq Olımpıadalyq komıtetiniń (HOK) 144-shi sessııasynda Tomas Bah HOK-niń qurmetti prezıdenti bolyp ómir boıyna saılandy.
Qazaqstan UOK jáne Halyqaralyq Olımpıada Komıteti yntymaqtastyqty nyǵaıtady.