Halyqaralyq qustar kúni: Almaty botanıkalyq baǵynda qustardyń 300-ge jýyq túri mekendeıdi

ALMATY. KAZINFORM - Búgin - Halyqaralyq qustar kúni. Almaty botanıkalyq baǵynyń málimetinshe, ekologııalyq mereke qustardyń túrliligi men sanyn saqtaý, sondaı-aq, olardyń máselelerine nazar aýdarý maqsatynda qurylǵan.

Bas botanıkalyq baq kóptegen qustardyń mekeni bolyp tabylady.

«Munda qustardyń 300-ge jýyq túrin kezdestirýge bolady: sary shymshyq, qyrǵaýyldar, úkiler, saýysqandar, úırekter, kógershinder, t. b. Botanıkalyq baqtyń biregeı mıkroklımaty men ekojúıesiniń arqasynda kóptegen qustar bizdiń baqshamyzdy qystaýǵa, sondaı-aq, alys saparǵa ushqan ýaqytta aıaldama retinde toqtaıdy. Qustar aǵashtar men ósimdikterdegi zııandy jándikterdi joıý arqyly bizge úlken paıda ákeledi. Bul jándikter zııankesterimen kúresýdiń eń ekologııalyq taza ádisi», — dep jazdy botanıkalyq baqtyń ujymy. 

Aıta keteıik, Almaty botanıkalyq baǵy qustardyń sanyn kóbeıtý úshin eki jyl qatarynan qus uıalaryn jınaýdy bastaǵan, al bıyldan bastap qorektendirgishterdi jınaýdy bastady.

«Qamqor azamattardyń kómegimen baqtyń aınalasyna 125 qorektendirgishterdi jınap, ilip qoıdyq. Sondaı-aq qustardyń qysta ash qalmaýy úshin azyq-túlik jınadyq. Bizdiń ekologııalyq bastamalarǵa jaýap berip, qoldaý bildirgen azamattarǵa alǵys aıtamyz. Birlesken kúsh-jiger arqyly biz qanatty dostarymyzdy saqtap, qorǵaı alamyz», — dedi botanıkalyq baq ujymy jelide.

Eske salaıyq, qystan aman-esen shyqqan aqqýlar jaqynda Almaty botanıkalyq baǵyna oralǵan bolatyn.