Halyqaralyq ahýal odan saıyn kúrdelene tústi – Mırzıeev Reseıdegi terakt jaıly

TAShKENT. KAZINFORM – Biz qıyn ári qaýipti kezeńde ómir súrip jatyrmyz. Bul týraly Tashkent halyq depýtattary keńesiniń sessııasynda sóz sóılegen Ózbekstan prezıdenti Shavkat Mırzıeev málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Prezıdenttiń baspasóz hatshysy Sherzod Asadovtyń málimdeýinshe, Shavkat Mırzıeev keńes barysynda qalyptasqan qazirgi kúrdeli halyqaralyq jaǵdaıǵa erekshe toqtaldy.

«Biz qıyn ári qaýipti kezeńde ómir súrip jatyrmyz. Taıaý Shyǵystaǵy jáne negizgi seriktesterimiz arasyndaǵy qaqtyǵystar áli sheshimin tappady. Sonymen qatar Máskeý oblysyndaǵy terrorlyq aktiniń saldarynan halyqaralyq ahýal odan saıyn kúrdelene tústi. Biz qazirgi ýaqytta «qaı memleket osyndaı jaǵdaıdyń bolmaıtynyna kepildik beredi?» degendi oı eleginen ótkizýimiz kerek», - dedi Ózbekstan basshysy.

Shavkat Mırzıeev osyndaı ýaqyttarda Ózbekstan úkimetiniń aldynda turǵan basty mindetterdiń biri ekonomıkaǵa jáne halyqtyń tabysyna teris áser etetin faktorlardy azaıtý ekenin atap ótti.

«Ol úshin mahallanyń ekonomıkalyq bazasyn nyǵaıtý jáne halyqtyń tabysyn ulǵaıtý úshin qolda bar múmkindikterdi tolyq paıdalaný qajet», - dep toqtaldy ol.

Kórshiles memlekettiń basshysy jaýapty organdarǵa Ózbekstan azamattarynyń ózge elderdiń eńbek naryǵyna shyǵýyn jeńildetý jáne Otanyna oralǵan mıgranttardy jumyspen qamtý máselesin júıeli sheshý boıynsha birqatar tapsyrma berdi.

Eske sala ketsek, 22 naýryz kúni Máskeý oblysyndaǵy «Crocus City Hall» ortalyǵyna qarýlanǵan adamdar basa kóktep kirip, kelýshilerge oq jaýdyrǵan. Saldarynan 500-den astam adam jaraqat alyp, 140-tan asa azamat mert boldy. Olardyń ishinde balalar da bar.