Halyq geologi Qosym Pishenbaev týraly kitap jaryq kórdi
PAVLODAR. KAZINFORM - Ekibastuz qalasynda áıgili halyq geologi, ken bilgiri Qosym Pishenbaevtyń 180 jyldyǵyna arnalǵan «Qosymnyń taǵdyry» kitabynyń tusaýy kesildi.
Povestik kitaptyń avtory – baıanaýyldyq ólketanýshy Aleksandr Cherkashın. Kitaptyń qoljazbasy 1972 jyly Baıanaýyl kentinde baspa mashınkasyna túsirilgen.
Bul kitaptyń jazylýyna akademık Qanysh Imantaıuly Sátbaev túrtki bolǵan. Qoljazba kúıinde QazKSR Jazýshylar odaǵynyń kórkemdik keńesine jiberilip, belgili sebeptermen keıin qaıtarylǵan. Povest araǵa jarty ǵasyrdan astam ýaqyt salyp oqyrmanǵa alǵash ret jol tartyp otyr.
Týyndy Pavlodar oblystyq Buqar jyraý atyndaǵy ádebıet jáne óner mýzeıiniń uıytqy bolýymen qazaq jáne orys tilderinde jaryq kórip otyr.
Kitap Qosym Pishenbaevtyń ken barlaýshylyq ómiriniń mańyzdy kezeńderin sýretteıdi. Qosymnyń balalyq shaǵy, ata-anasynyń baı aýylynan kórgen qorlyǵy, alǵashqy tabylǵan ken oryndary men orys kópesteriniń qazaq jerindegi ónerkásipteri týraly, Ekibastuz kómiri men Maıqaıyń altyn kenishindegi alǵashqy ónerkásipter, basqa da derekti maǵlumattar keńinen qamtylǵan. «Kedeıdiń qoly qysqa», «Qosymnyń balalyq shaǵy», «Alǵashqy olja», «Alǵashqy mahabbat», «Alǵashqy aqsha», «Alǵashqy saýda», «Qarsylas paıda boldy», «Taý bókterindegi zaýyt», «Qosym baıdan kek aldy», «Qosym óndiristik artel uıymdastyrdy», «Kútpegen qonaq», «Ekibastuz», «Maıqaıyń», «Ótken kúnder men búgingi zamannyń toǵysy» bólimderinen turady.
Povest Toraıǵyrov ýnıversıtetiniń jáne Baıanaýyldaǵy «Ánet» sharýa qojalyǵynyń demeýshiligimen, qazaq jáne orys tilderinde «Parasat» baspahanasynda basylyp shyqty.
Tusaýkeser is-sharasynda Q.Pishenbaevtyń atalas týysy Amantaı Esimbaev pen ólketanýshy A.Cherkashınnyń urpaǵy Galına Baek estelikter aıtty. A.Cherkashın «Baıanaýl», «Doch Baıanaýla», «Qosymnyń taǵdyry» kitaptaryn jazǵan, Baıanaýyl óńiriniń arǵy-bergi tarıhy týraly mol maǵlumattar qaldyrǵan.
Іs-sharada sondaı-aq Júsipbek Aımaýytovtyń 135, Sábıt Dónentaevtyń 130, Qanysh Sátbaevtiń 125, Álkeı Marǵulannyń 120, Sháken Aımanovtyń 110, Rústembek Omarovtyń 105, Múbárak Jamanbalınovtyń 100, Qımadıden Nyǵmanovtyń 100 jyldyq mereıtoılaryna arnalǵan kórme uıymdastyryldy.
Eske sala keteıik, aty ańyzǵa aınalǵan áıgili kentanýshy Qosym Pishenbaev týraly buǵan deıin arnaıy materıal jarııalaǵan edik.
