Hakerler zeınetkerlerdiń aqshasyn urlaı bastady - UQK

ASTANA. QazAqparat - QR Ulttyq qaýipsizdik komıteti iri bankterge jasalǵan kıbershabýyldy toqtatty, dep xabarlaıdy QazAqparat tilshisi.

Aqparattyq qaýipsizdik departamentiniń dırektory Sergeı Jýravlevtiń aıtýynsha, xakerler fıshıng shabýyldar arqyly aqsha urlaıdy. Ondaıda arnaıy vırýstary bar xattar taratylady. Ony ashqannan keıin xakerler kompıýter, ıa bolmasa, smartfonǵa kirip alady da, adamnyń jeke málimetterin ıemdenip ketedi. Al jeke málimetterdiń kómegimen esepshotta jatqan aqshany op-ońaı urlaýǵa bolady.

"Máselen, sońǵy ret senbi kúni Sberbank pen Halyq bankine fıshıng shabýyl jasaldy. Sol kezde zeınetkerlerdiń aqshasyn urlady. Hakerler adamdardyń jeke málimetterin urlaý arqyly san alýan alaıaqtyq áreketter jasaıdy. Jalpy, bankterge xakerlik shabýyldar jıi jasalady. Óıtkeni ol jerde aqsha bar", - dedi S.Jýravlev jýrnalısterge bergen suxbatynda.

Onyń sózine qaraǵanda, aǵymdaǵy jylda memlekettik organdarǵa da biraz kıbershabýyldar jasaldy.

"Búginde biz kıbershabýyldardyń 80 protsentin avtomatty túrde qaıtaryp otyramyz. Qalǵanyn qolma-qol jumys istep qaıtaramyz. Negizi, ondaı shabýyldar demalys kúnderi kóbeıedi", - dep atap kórsetti S.Jýravlev.

Aıta keteıik, elimizde kıberqaýipsizdik salasyndaǵy maman tapshylyǵy máselesi ózekti bolyp tur. Osy salada jalaqynyń mólsheri 1500 - 3000 dollarǵa deıin barady. Alaıda kásibı mamandar az.  Aldaǵy ýaqytta "Qazaqstannyń kıberqalqany" tujyrymdamasy aıasynda jańa akademııany ashý josparlanyp otyr. Al QR UQK Shekara qyzmetinde aqparattyq qaýipsizdik batalony qurylady.