Ǵylymı zertteý salasynda ýnıversıtetterdiń jaýapkershiligi artady

ASTANA. QazAqparat – Óńirlerdegi joǵary oqý oryndaryn zertteý ýnıversıteti modeline birtindep kóshiremiz. Bul týraly Májiliste ǵylymdy damytý taqyrybyndaǵy Úkimet saǵatynda QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Qazaqstanda júrgizilgen birqatar reformalarǵa qaramastan, keıingi 30 jylda ǵylym ekonomıkalyq damý men azamattardyń ál-aýqatynyń ósýiniń negizgi draıverine aınalmady. 1991 jyly ǵylym salasynda 52 myń zertteýshi tirkelse, 2000 jyly 12 myń ǵana adam qaldy. 90-shy jyldary 30 myńnan astam adam basqa salaǵa aýysyp ketti. Qazir endi ǵylymı kadrlar sany 22 myńnan asyp otyr», - dedi S. Nurbek.

Onyń aıtýynsha, salaǵa qarajat bólinip jatyr, ǵylymı zertteý granttary ıgerilýde. Alaıda ınnovatsııalyq ónimniń naqty salalyq óndiristegi, halyqtyń kúndelikti ómirindegi úlesi óte az. Sondyqtan osy negizgi máseleni sheshý kerek.

«Ýnıversıtetter men ındýstrııa arasyndaǵy yntamaqtastyqqa toqtalsaq, joǵary oqý oryndary ǵylymı zertteý men ınnovatsııanyń qaınar kózine aınala almaı otyr. Zertteý formatyna, modeline kóshken ýnıversıtterdiń úlesi az», - dedi mınıstr.

Onyń sózine qaraǵanda, ǵylymı jańǵyrtý jáne tsıfrlandyrý aıasynda mańyzdy is-sharalar atqarylmaq. Zerthanalardy jabdyqtaýǵa qomaqty qarajat qarastyrylyp otyr.

«Óńirlerdegi 15 joǵary oqý ornyn tańdadyq. Olardy zertteý ýnıversıteti modeline birtindep kóshiremiz. Negizgi ǵylymı zertteý áleýeti joǵary oqý oryndaryna tıesili bolýy kerek. Birqatar damyǵan elde osy baǵytqa basymdyq berilgen. Biz de osy reformany bastadyq. Endi negizgi júkti joǵary oqý oryndaryna júkteımiz», - dedi vedomstvo basshysy.

Budan buryn habarlanǵandaı, qazirgi kezde elimizde 22 456 ǵylymı kadr bar.

Zertteýshilerdiń 37 paıyzynda (2022 jyly – 35%) ǵylymı jáne akademııalyq dárejesi bar. Sondaı-aq, zertteýshilerdiń 34 paıyzyn – 35 jasqa deıingi jas ǵalymdar, 43 paıyzyn – 35-54 jastaǵylar, 23 paıyzyn 55 jastan asqan ǵalymdar qurap otyr.