Ǵylymı ekspedıtsııa qazaq handarynyń joldarymen júrip ótti

ASTANA. QazAqparat - Memleket tarıhy ınstıtýtynyń ǵylymı ekspedıtsııasy qazaq handarynyń joldarymen júrip ótti. Bul týraly Ortalyq kommýnıkatsııalar qyzmetindegi baspasóz máslıhatynda atalǵan ınstıtýttyń dırektory Búrkitbaı Aıaǵan málim etti.

Ǵalymnyń sózine qaraǵanda, ekspedıtsııaǵa qatysýshylar Astanadan bastap jalpy 4,5 myń shaqyrym jerdi eńsergen. Osy oraıda olar qazaq halqynyń tarıhına baılanysty kóptegen oryndarǵa toqtady.

«Biz osy saparǵa tyńǵylyqty daıyndaldyq. Osy ekspedıtsııanyń negizgi maqsaty - qazaq handarynyń joldaryn óz kózimizben kórip, qosymsha málimetterdi anyqtaý. Jalpy jolda toǵyz kún boldyq. Birinshi barǵan jerimiz Ulytaý boldy. Ol jerde Joshy han, Alasha han kesenelerine baryp, olardy zertteýge qatysty derekterdi jınadyq jáne osy óńirdegi tanymal ózge de jerlerdi araladyq. Budan keıin Ońtústik Qazaqstandaǵy Sozaq, Syǵanaq, Saýran sekildi kóne qalalardyń oryndaryna, sondaı-aq Qazaqstan tarıhy úshin óte mańyzdy Túrkistan qalasyna toqtadyq. Munymen qosa, Tarazdaǵy tarıhı eskertkishterge de arnaıy bardyq. Sonymen qosa birneshe kún buryn Kókshetaý óńirine baryp, Ýálı hannyń kesenesinde boldyq. Jalpy ekspedıtsııanyń negizgi maqsattary oryndaldy dep sanaımyz», - dedi B. Aıaǵan.

Osy oraıda ol ekspedıtsııa kezinde jınalǵan aqparattar ınstıtýt ujymynyń budan ary qaraı júrgizetin ǵylymı jumystarynda keńinen paıdalanylmaq.

«Bul derekterdi aldaǵy ýaqytta arnaıy konferentsııada arnaıy talqylap, kitap retinde shyǵarmaqpyz. Sapar boıynsha úlken esepti ǵalymdardyń aldynda jasaýdy kózdep otyrmyz»,-dedi ınstıtýt dırektory.