Ǵylym kandıdattarynyń jumysyn plagıatqa tekserý usynyldy

ALMATY. QazAqparat  - QR Ǵylym akademııasy múshelerimen kezdesý barysynda QR Premer-mınıstri Baqytjan Saǵyntaevqa ǵylym kandıdattarynyń jumysyn plagıatqa tekserý týraly usynys aıtyldy, dep habarlaıdy QazAqparat tilshisi.

Kezdesý barysynda Úkimet basshysy jas ǵalymdardyń otandyq ǵylymdy damytý baǵytyndaǵy usynystaryna qulaq asty.

Almaty Management University ǵylymı zertteýler ortalyǵynyń dırektory, jas ǵalym Danııar Saparǵalıev ǵylym kandıdattarynyń jumysyn plagıatqa tekserýdi usyndy.

«Ǵalymdardyń ǵylymı jumystarynyń sapasyn arttyryp, olardyń qataryn tazalaıtyn ýaqyt keldi. Qazaqstanda jumystardyń kópshiligi jańa ereje qabyldanǵanǵa deıin plagıatqa tekserilgen joq. Barlyq doktorlyq, magıstrlik jumystar antıplagıtqa tekseriledi. 2011 jylǵa deıin olar kandıdattyq dıssertatsııa qorǵaǵan. Olardyń jumysy tekserilmegen. Men bul jumystardy reseılik «Dıssernet» qoǵamy arqyly tekserýdi usynamyn. Biz olarmen baılanysqa shyqtyq. Reseılik uıym bizben jumys isteýge daıyn. Sonymen qatar, Qazaqstanda ǵylymı dáreje alý erejeleri de joq. Kandıdattyq jumystar ashyq túrde esh jerde jarııalanbaıdy», - dedi Danııar Saparǵalıev.

QazUÝ fızıka-hımııalyq zertteý tásilderi men taldaý ortalyǵynyń dırektory Bolat Keńesov joǵarǵy bilim salasyndaǵy ǵylymnyń damýy jaıly aıtyp ótti.

Onyń aıtýynsha, stýdentterdiń jańa jobalarynyń arqasynda ýnıversıtetter ǵylymnyń damýyna eleýli úles qosyp keledi. Osyǵan qaramastan, joǵarǵy bilim salasyndaǵy ǵylymnyń damýyna birqatar kedergi bar eken.

«Eń aldymen, ýnıversıtetterdiń materıaldyq jabdyqtalýy syn kótermeıdi. Kóp jyldan beri jańa jabdyq satyp alý týraly másele kóterilmeı keledi. Sonyń kesirinen otandyq JOO-lar sheteldik JOO-larmen básekege túse almaı otyr. Ýnıversıtetterge bolashaǵynan úmit kúttiretin jas ǵalymdar kelmeıdi. Sebebi, shákirtaqy óte tómen. 80 myń teńge úsh jyldan beri kóterilmegen. Jeke sektor olarǵa kóbirek tóleıdi. Olardyń ary qaraı ósýine óte kóp nárse kedergi. Granttardy ekiniń biri jeńe bermeıdi, basqa saladaǵy ǵalymdarmen básekelesý óte qıyn. Kóp jaǵdaıda jas ǵalymdar shetelge ketýge májbúr bolady», - dedi jas ǵalym.

Bolat Keńesov osy baǵytta úsh shara qabyldaýdy usyndy.

«Birinshiden, ýnıversıtetterdi zamanaýı jabdyqtarmen qamtyp, ǵylym doktorlarynyń shákirtaqysyn 150 myń teńgege deıin kóterý, ýnıversıtet bitirgen doktoranttarǵa arnalǵan ulttyq baǵdarlama qurý kerek», - dedi ol.

Kezdesý sońynda Baqytjan Saǵyntaev atalǵan salaǵa baılanysty óz oıyn jetkizip, naqty tapsyrmalar berdi.

Eske salaıyq, osyǵan deıin jas ǵalymdar Úkimet basshysyna ǵylymdaǵy problemalar týraly aıtqan bolatyn.