Gvıneıa-Bısaýda jańa Premer-mınıstr taǵaıyndaldy
ASTANA. KAZINFORM – Gvıneıa-Bısaýda jańa Premer-mınıstr taǵaıyndaldy, dep habarlaıdy Sınhýa.
Gvıneıa-Bısaý eliniń ýaqytsha prezıdenti Orta N’Tam prezıdenttik jarlyqqa qol qoıyp, Ilıdıo Vıeıra Teni Premer-mınıstr ári Qarjy mınıstri qyzmetine taǵaıyndady. Taǵaıyndaý sheshimi birden kúshine endi.
Ilıdıo Vıeıra Te 1983 jyly eldiń batysyndaǵy Bıombo óńirinde dúnıege kelgen. Ol Gvıneıa-Bısaýdaǵy úshinshi iri saıası kúsh sanalatyn Áleýmettik jańǵyrý partııasynyń múshesi. 2022 jyldyń shildesinen beri osy memlekettegi sońǵy saıası ózgeristerge deıin Qarjy mınıstri qyzmetin atqarǵan.
Bıylǵy prezıdenttik saılaý kezinde Ilıdıo Vıeıra Te No Kumpu Guine («Gvıneıa-Bısaý úshin birlik») koalıtsııasynyń ulttyq saılaý kampanııasyn basqardy. Bul alıans birqatar partııalardyń basyn qosqan jáne óz kandıdaty retinde bılikten taıdyrylǵan prezıdent Ýmarý Sısoký Embalony usynǵan.
Eske salaıyq, Batys Afrıkadaǵy Gvıneıa-Bısaý eliniń áskeri sársenbi kúni «eldi tolyq baqylaýǵa alǵanyn» jáne «saılaý protsesin toqtatqanyn» jarııalaǵan edi. Keıinnen áskerı basshylyq ýaqytsha prezıdentti taǵaıyndady.