Gúljan Ónerbekova: Jaqsy kórip aınalysqan is - shabyttandyrady

NUR-SULTAN. QazAqparat – Elimizde bir qolymen besik, bir qolymen álemdi terbetip, shańyraǵyna da, qoǵamdyq sharalarǵa da birdeı kóńil bólip júrgen názik jandylar az emes. Olar óner, bilim, medıtsına, ekonomıka jáne basqa da mańyzdy salalarda jaýapty qyzmet atqaryp, elimizdiń damýyna laıyqty úlesterin qosyp keledi. Sondaı jandardyń biri – Nur-Sultan qalasy boıynsha Qazynashylyq departamenti basshysynyń orynbasary Gúljan Ónerbekova.

Ol Taldyqorǵan oblysy, Alakól aýdany, Úsharal aýylynda dúnıege kelgen. Alakóldiń boıynda ornalasqan aýylda, 6 balaly úlken shańyraqta ósken.

«Bala kezimde el qatarly mektepti bitirip, ınstıtýtqa túsip, úlken ómirge joldama alýdy armandadym. Úsh ápkem de anamnyń jolyn qýyp, medıtsınalyq bilim alyp, sol salada eńbek etip jatyr. Ákem qyzmet jolyn agronom bolyp bastap, keıin 25 jyl boıy Taldyqorǵan oblysyndaǵy ártúrli aýdannyń ákimi boldy. Ekonomıst bolǵym keletinin aıtqan kezde ata-anam meni qoldady», - deıdi Gúljan Ónerbekova.

1987 jyly Qaraǵandy kooperatıvtik ýnıversıtetin «ekonomıst» mamandyǵy boıynsha támamdap, Alakól aýdanyndaǵy saýda júıesinde ekonomıst bolyp qyzmet atqarǵan.

«Turmysqa shyǵyp, úsh balany tárbıeledim. Qazirgi ýaqytta 7 nemeremniń qyzyǵyna batyp júrgen jaıym bar. 1997-1999 jyldary Almaty qalalyq qazynashylyq basqarmasynyń qazynashysy, jetekshi qazynashysy, sektor meńgerýshisi bolsam, qazirgi tańda Nur-Sultan qalasy boıynsha Qazynashylyq departamenti basshysynyń orynbasary qyzmetin atqarýdamyn. Qazynashynyń jumysy – bıýdjetti kassalyq atqarý boıynsha memlekettik organdarǵa qyzmet etý, atap aıtqanda qarjylandyrý josparlaryn júrgizý, tólemder júrgizý jáne basqa da memlekettik bıýdjetti oryndaý boıynsha operatsııalar júrgizý», - deıdi ol.

Onyń aıtýynsha, 2002 jyly qazynashylyqtyń ıntegratsııalanǵan aqparattyq júıesi, al 2008 jyly memlekettik organdarmen elektrondyq qujat aınalymy úshin «qazynashylyq-klıenttik» aqparattyq júıesi engizilgen.

«Osy júıeni engizýde úles qostym. Bul aqparattyq júıeni engizý memlekettik organdardyń qyzmet kórsetý, kólik jáne basqa shyǵyndarynyń ýaqytyn qysqartýǵa múmkindik berdi. Qashyqtaǵy rejımde bıýdjettiń atqarylýy men belgili bir operatsııalardy júrgizý týraly suraýlar men esepter jasalady. Paıdalanýshynyń avtomattandyrylǵan jumys ornynyń kómegimen qujattardy toltyrý, berý jáne baqylaý memlekettik organdardyń oryndaýshylary arasyndaǵy adamdardyń baılanysyn aınalyp ótip, júzege asyrylady. Bul – qujattardy óńdeý protsesin jedeldetip qana qoımaı, sybaılas jemqorlyq táýekelin joıady . Aıta ketý kerek, Qazaqstan Respýblıkasynyń Memlekettik bıýdjetin atqarýǵa arnalǵan aqparattyq júıeler álemdegi eń úzdikter qataryna kiredi», - deıdi Nur-Sultan qalasy boıynsha Qazynashylyq departamenti basshysynyń orynbasary.

Gúljan Májenqyzy otbasy men qyzmet jolyn qatar alyp júrgisi keletin qyz-kelinshekterge keńes aıtty.

«Eń bastysy, úlkenge – qurmet, kishige – izet» degen qaǵıdany umytpaýymyz kerek. Armanǵa adal bolyp, qoǵamdyq jumystarǵa belsene aralasý qajet. Jumysqa berilip, otbasy aldyndaǵy jaýapkershilikti de umytyp ketýge bolmaıdy, sebebi úıdegi bala-shaǵanyń tárbıesi áıeldiń moınynda. Jumysqa da, úı sharýalaryna da úlgerý – ońaı emes, biraq jaqsy kóretin ispen aınalysý – adamdy sharshatpaıdy, kerisinshe shabyt syılaıdy», - deıdi ol.