Gúlshara Ábdiqalyqova qyzylordalyq jastarmen júzdesti
Aldymen aımaq basshysy Á.Tájibaev atyndaǵy ámbebap-ǵylymı kitaphanasynda «Kitap qurttary» klýbynyń múshelerimen kezdesti. Atalǵan klýb 2019 jyldyń aqpan aıynda kitapqumar jastardyń bastamasymen ashylǵan. Qazirgi tańda 100-ge jýyq múshesi bar. Oqýǵa yntaly jastar ár senbi saıyn túrli janrdaǵy kitaptar men fılmderdi talqylaıdy.
Atalǵan iske uıytqy bolyp júrgen Talǵat Meńdibaev klýbtyń Qazaly aýdanynda bólimshesi ashylǵanyn atap ótti. Aldaǵy ýaqytta mundaı oryndardy ózge aýdandarda ashý josparlanyp otyr. Sondaı-aq, izdenimpaz stýdentterge arnap Qorqyt ata ýnıversıtetinde qosymsha kýrs jumysyn bastaǵan.
Kezdesýde jastar aımaq basshysymen kitap oqý mádenıeti týraly erkin oı qozǵady. Gúlshara Ábdiqalyqova ıntellektýaldy ult qalyptastyrýda kitap oqýdyń mańyzdylyǵyn qaperge salyp, jastardy «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda qazaq tilinde jaryqqa shyqqan kitaptardy oqýǵa shaqyrdy.
Jastarmen tildesken oblys ákimine klýb oqyrmandary «Qyz Jibek» dastanyn tabystady jánee qala ishinde jastardy oqýǵa jeteleıtin birneshe ıdeıasyn usynys retinde bldirdi.
Kezdesý sońynda aımaq basshysy jastar tarapynan aıtylǵan usynys-pikirlerdi eskerip, aldaǵy ýaqytta jastar keńesinde talqylanatynyn tilge tıek etti.
Bıyl mektepter men ýnıversıtetterde oqý jyly dástúrli formatta bastaldy. Qashyqtan bilim alyp kelgen jastar oqý oryndaryna bardy. Sanıtarııalyq talaptardy saqtaı otyryp, bilim alýda. Bul rette oblys ákimi Qorqyt ata atyndaǵy Qyzylorda ýnıversıtetiniń №5 jataqhanasyna bardy. Nysannyń jaǵdaıyn baqylap, stýdentter tynys-tirshiligimen tanysty.
Jastar óńir basshysyna kókeıde júrgen saýalyn qoıyp, túrli bastamalardan týyndaǵan ıdeıalaryn ortaǵa saldy.
Jataqhana ǵımaraty 400 stýdentke arnalǵan. Munda bos ýaqytyn tıimdi ótkizýi úshin stýdentterdiń shyǵarmashylyq jumystarmen aınalysýyna múmkindigi bar. Kitap oqyp, demalys bólmelerinde tynyǵa alady. Jastar uıymdary jataqhanalardaǵy tárbıelik is-sharalardy joǵary deńgeıde ótkizýge yqpal etedi.
Sonymen qatar №5 stýdenttik jataqhana aýlasynda sporttyq oıyndarǵa arnalǵan alań jabdyqtalǵan. Ótken jyly fýtbol alańy kúrdeli jóndeýden ótti.
Oblys ákimi sóz sońynda jataqhanada sanıtarlyq normalardy qatań saqtap, aýlany kórkeıtý jáne kógaldandyrý jumystaryn turaqty júrgizip otyrý qajettigin eske saldy.
Ýnıversıtette bilim alatyn jastar bos ýaqytyn sporttyq keshenderde ótkizedi. Óńir basshysy ýnıversıtet bazasyndaǵy «Seıhýn» sporttyq-saýyqtyrý keshenin aralap, nysannyń materıaldyq-tehnıkalyq bazasymen tanysty. 2010 jyly paıdalanýǵa berilgen sport kesheninde fýtzal, voleıbol, gandboldan jarystar men barlyq deńgeıdegi túrli spartakıadalar ótkizilip turady. Al, júzý basseınine kelýshilerdi bilikti nusqaýshylar, medıtsına qyzmetkerleri baqylap otyrady.
Aımaq basshysy buqaralyq sportpen turaqty túrde aınalysý jastardan bastaý alý qajettigin atap ótti. Bul rette óńirde ýnıversıtet bazasynan bólek, túrli sektsııalarǵa tegin qatysý múmkindigi qarastyrylǵanyn eske saldy.
