«Gúlder» ansambliniń solısi halyqaralyq baıqaýdyń jeńimpazy atandy
ASTANA. KAZINFORM – 2025 jyldyń 24-27 sáýiri aralyǵynda XVIII «Rıga kóktemi – 2025» halyqaralyq horeografııalyq baıqaýy ótti. Bul týraly Mádenıet jáne aqparat mınıstrligi habarlady.
Baıqaýǵa Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń «Gúlder» ansamblinen balet ártisi Sanııa Sákenova men bas baletmeıster Anvara Sadyqova qatysty.
Baıqaý horeografııanyń úsh atalymy boıynsha ótti. Atap aıtsaq, klassıkalyq bı, halyq bıi jáne zamanaýı horeografııa.
Baıqaýǵa Qazaqstannan bólek Germanııa, Italııa, Latvııa, Lıtva, Estonııa, Ýkraına, Soltústik Afrıka elderinen ónerpazdar qatysty. Ansambl solısi Sanııa Sákenova І dárejeli laýreat atanyp, eki altyn medal jeńip aldy. Ol baıqaý baǵdarlamasynda Anvara Sadyqova qoıǵan «Aqbaıan» qazaq bıin jáne Ernur Qaryqbol qoıǵan «Temýlen» mońǵol bıin bıledi. Sondaı-aq, ansambl bıshisi oryndaýshylyq sheberligi men ártistik óneri úshin Amerıka Qurama Shtattaryndaǵy Margo Fonteın atyndaǵy Balet akademııasynda eki aptalyq oqý stıpendııasynyń sertıfıkatyna ıe boldy.
«Gúlder» ansambliniń bas baletmeısteri Anvara Sadyqova men Sanııa Sákenova Margo Fonteın balet akademııasynyń kórkemdik jetekshisi Kennet Laddenniń arnaıy shaqyrtýyn aldy.
Sonymen qatar qazylar alqasynyń sheshimi boıynsha «Gúlder» ansambli «Ulttyq bı mádenıetin saqtaý jáne damytý» arnaıy syılyǵymen marapattaldy.
Aıta keteıik, «Gúlder» ansambliniń 55 jyldyq mereıtoıyna arnalǵan gala-kontsert ótti.