GÝLAG murajaıynda Qazaqstan memorıaldyq aımaǵy bar Estelik baǵy ashyldy

NUR-SULTAN. QazAqparat - GÝLAG murajaıynda Qazaqstan memorıaldyq aımaǵy bar Estelik baǵy ashyldy. Qazaqstannyń Reseıdegi Elshiliginiń dıplomattary GÝLAG tarıhy murajaıynyń estelik baǵynyń ashylýyna qatysty, dep habarlaıdy QazAqparat Qazaqstannyń Reseıdegi elshiliginiń resmı saıtyna silteme jasap,

Estelik baǵy- bul murajaı ekspozıtsııasynyń jalǵasy jáne ol serýendeýge jáne oılanýǵa arnalǵan qoǵamdyq keńistik ispettes.

Onyń memorıaldyq bóligi qamaýda otyrǵyzylǵan jerlerden ákelingen, sondaı-aq qýǵyn-súrginge ushyraǵandardyń otbasy músheleri otyrǵyzǵan taldardan, tastar men butalardan turady. Bul keńistik jappaı qýǵyn-súrgin taqyrybyn túsinýge baǵyttalǵan kórkemdik jáne memorıaldyq tájirıbe alańyna aınalady. Onda arnaıy jasalǵan kóshe músinderi men ınstallıatsııalary ornalastyrylyp, GÝLAG tarıhyna qatysty aýqymdy jobalar júzege asyrylatyn bolady.

Baqshanyń memorıaldyq aımaqtarynyń biri Qazaqstanǵa arnalǵan. QR-nyń RF-daǵy Elshiliginiń dıplomattary 36 lageriniń 11-i Qazaq KSR aýmaǵynda bolǵanyn, onyń ishinde ALJIR, Steplag, Karlag – GÝLAG qurylymynyń eń iri lagerleri bolǵanyn atap ótti. Qýǵyn-súrgin jyldary 5 mıllıonnan astam adam Qazaqstan lagerlerine jer aýdaryldy.

Qazaq halqy totalıtarlyq rejım qurbandaryn eske alady. 31 mamyrda Qazaqstanda jyl saıyn saıası qýǵyn-súrgin qurbandaryn eske alý kúni atap ótiledi. Tarıh oqýlyqtarynda zulmat jyldar týraly aıtylady, kitaptar shyǵarylady, fılmder túsiriledi, qalalar men aýyldarda memorıaldyq stelalar ornatylady, murajaılarda tıisti ekspozıtsııalar uıymdastyrylady. Munyń bári qoǵam úshin beıbit evolıýtsııalyq damýdyń qundylyǵyn túsiný úshin jáne mundaı oqıǵalardyń qaıtalanýyna eshqashan jol bermeý úshin óte mańyzdy.