Gýanchjoýda masa arqyly chıkýngýnıa bezgegi tarap jatyr

ASTANA. KAZINFORM – Qytaıdyń ońtústigindegi Gýandýn provıntsııasynyń Foshan qalasynyń densaýlyq saqtaý basqarmasy chıkýngýnıa bezgegi indeti týraly habarlama jarııalap, aýrýǵa shaldyqqandar sany 1 200-ge jýyqtaǵanyn málimdedi. 

Qytaılyq chinanews.com.cn aqparattyq portalynyń málimetine súıensek, Foshan qalasynyń Chanchen, Nanhaı jáne Shúnde aýdandarynda chıkýngýnıa bezgegi indeti tirkelgen. 2025 jyldyń 18 shildesine deıin Shúnde aýdanynda 1 161, Nanhaı aýdanynda 16, al Chanchen aýdanynda 22 jaǵdaı anyqtalǵan.

Chıkýngýnıa bezgegi – chıkýngýnıa vırýsynan týyndaıtyn jedel juqpaly aýrý. Ol negizinen masanyń shaǵýy arqyly taralady. Barlyq jastaǵy adamdar indetti juqtyrýy múmkin. Aýrý belgilerine joǵary temperatýra, býyndar men bulshyqetterdiń aýyrýy jáne teridegi bórtpeler jatady. Chıkýngýnıa bezgegimen aýyrǵandardyń kópshiligi jeńil formada aýyrady jáne shamamen bir aptada jazylady. Aýyr jaǵdaılar men ólim-jitim sırek kezdesedi. 

Gýanchjoý bıligi indet tirkelgen úsh aýdanda «Barsha turǵynǵa úndeý» jarııalap, olardy demalys kúnderi masalardyń kóbeıý oshaqtaryn joıýǵa jáne eresek masalardy joıýǵa belsendi qatysýǵa shaqyrdy. 

Buǵan deıin Qytaıda masa arqyly taralatyn qaýipti vırýstyń órshýi baıqalǵanyn jazǵan edik.