Grýzııanyń eks-prezıdenti Mıhaıl Saakashvılı 9 jylǵa sottaldy

ASTANA. KAZINFORM — Tbılısı qalalyq soty burynǵy prezıdent Mıhaıl Saakashvılıdi 9 mln ları (shamamen 3,2 mln dollar) kólemindegi bıýdjet qarajatyn jymqyrdy degen aıyppen 9 jylǵa bas bostandyǵynan aıyrdy, dep habarlaıdy grýzındik BAQ.

Bul rette áńgime 2009-2013 jyldary 8,8 mln astam ları kólemindegi qarjyny jymqyrý týraly bolyp otyr. Bul is Grýzııada «penjekter isi» ataýymen belgili. Saakashvılıge aıyp 2014 jyly taǵylǵan.

Aıyptaý tarapy atap ótkendeı, bul somaǵa Saakashvılıdiń lıýks qonaqúıler men kýrorttardaǵy demalysy, kosmetologııalyq emhanalarǵa barýy jáne kıimge jumsalǵan shyǵyndary kiredi. Sondaı-aq atalmysh tizimde Londonda 28 600 dollarǵa satyp alynǵan jeti penjak pen kashemırden tigilgen sporttyq palto, sondaı-aq quny 4 600 dollar qoldan tigilgen eki kostıým bar.

Sot is boıynsha ekinshi aıyptalýshy — Memlekettik kúzet qyzmetiniń burynǵy basshysy Teımýraz Djanashııany qyzmettik ókilettigin asyra paıdalandy dep tanylyp, oǵan 300 myń ları (107 myń dollar) kóleminde aıyppul salyndy. 

Saakashvılı men Djanashııa sot úkimi jarııalanǵan kezde sotta bolmaǵan, olar ózderin taǵylǵan aıyp boıynsha kináli emes dep sanaıdy.

Eske sala ketsek, bul Mıhaıl Saakashvılıge shyǵarylǵan úshinshi úkim. Burynǵy saıasatker shekarany zańsyz kesip ótkeni jáne 2007 jylǵy qarashada oppozıtsııa mıtıngisin taratqany úshin sot protsesteri áli de jalǵastyp jatyr. Ol syrttaı alty jylǵa bas bostandyǵynan aıyryldy.

Birneshe úkim shyǵarylǵan jaǵdaıda Grýzııada jazany sińirý qaǵıdaty qoldanylady. Eks-saıasatker túrmede qamaýǵa alynǵan sátten bastap — 2021 jyldyń 1 qazanynan beri otyr, sáıkesinshe ol 2030 jyldyń 1 qazanynda bosatylýy múmkin.

Buǵan deıin Grýzııadaǵy saıası jaǵdaı qalaı damyǵanyn jazǵan bolatynbyz.