Grýzııanyń burynǵy qorǵanys mınıstri qamaýǵa alyndy
ASTANA. KAZINFORM — Tbılısı soty sybaılas jemqorlyq qylmystary úshin ustalǵan Grýzııanyń burynǵy qorǵanys mınıstri Djýansher Býrchýladzege bultartpaý sharasy retinde qamaýda ustaýdy tańdady, dep habarlaıdy Newsgeorgia.
Býrchýladze áskerı gospıtal úshin MRT apparatyn satyp alý kezinde qyzmettik ókilettikterin teris paıdalandy degen aıyp taǵylyp otyr. Bul is boıynsha alǵashqy qamaýǵa alý shilde aıynda ótti. Bıýdjet qarajatyn jymqyrdy degen kúdikpen burynǵy qorǵanys vıtse-mınıstri Georgıı Haındrava, vedomstvonyń burynǵy satyp alý bóliminiń basshysy jáne Býrchýladzeniń kúıeý balasy qamaýǵa alynǵan. Tergeý dereginshe, sheneýnikter ádeıi básekelestik orta qurmaı, kelisimshart qunyn 1,3 mln larıge arttyrǵan.
Sonymen qatar, aıyptalýshy bıyl qańtarda zańsyz tabystardy jasyrý úshin Ispanııadan 544 myń eýroǵa jer telimi bar úı satyp alǵany aıtylyp otyr. Prokýratýranyń málimetinshe, Býrchýladze Ispanııadaǵy jyljymaıtyn múlikti deklaratsııasynda kórsetpegen.
Býrchýladze aıybyn moıyndamaıdy. Ol Ispanııadaǵy úıdi anasynan qalǵan páterdi zańdy túrde satyp, sondaı-aq Tbılısı mańyndaǵy óz úıin kepilge qoıyp alǵanyn aıtty. Onyń sózinshe, satyp alǵannan keıin deklaratsııa tapsyrýǵa ýaqyt bolmaǵan.
Sot protsesinde ol aıyptaýdy «daıyndalmaǵan» dep atap, «onyń múldem basqa sebepterge baılanysty bolýy múmkin» degen kúdigin jetkizdi.
Qorǵaý tarapy eks-mınıstrdi kepildikpen bosatýdy suraǵanymen, sot prokýratýranyń ótinishin qanaǵattandyrdy. Aıyptaý tarapynan qamaýǵa alý sebebi retinde aıyptalýshynyń jasyrynyp qalý, dálelderdi joıý jáne kýágerlerge yqpal etý qaýpi kórsetildi.
Býrchýladzege 9 jyldan 12 jylǵa deıin bas bostandyǵynan aıyrý jazasy qaýpi tónip tur.
Býrchýladze 2021 jylǵy 22 aqpannan 2024 jylǵy 8 aqpanǵa deıin qorǵanys mınıstri qyzmetin atqardy. Ol premer-mınıstr Iraklıı Garıbashvılıdiń úkimetiniń múshesi bolǵan. Garıbashvılı buqaralyq aqparat quraldarynyń sybaılas jemqorlyq aıyptaýlary aıasynda otstavkaǵa ketip, bıyl kóktemde saıasattan ketetinin jarııalaǵan.
Eske sala keteıik, osy jyldyń naýryz aıynda Grýzııanyń eks-prezıdenti Saakashvılı memlekettik qarajatty iri kólemde jymqyrǵany úshin 9 jylǵa sottalǵan bolatyn.