Grýzııadaǵy sherýler: 100-den asa adam qamaýǵa alynyp, 10 polıtseı jaraqat aldy
TBILISI. KAZINFORM – Grýzııa astanasy Tbılısıdiń ortalyǵyndaǵy parlament ǵımaraty aldyndaǵy sherý kezinde polıtsııa 107 adamdy tutqyndady. Bul týraly Grýzııa Іshki ister mınıstrliginiń baspasóz qyzmeti habarlady.
Qaqtyǵys kezinde on polıtsııa qyzmetkeri jaralandy. Olardyń biri kúıik jaraqatymen aýrýhanaǵa jetkizilgen.
– Túni boıy narazylyq bildirýshiler polıtsııa qyzmetkerlerine qoqań-loqy jáne fızıkalyq kúsh kórsetti. Rýstavelı dańǵylynda tártip saqshylaryna tastar, pırotehnıkalyq zattar, shyny ydystar men temir zattar laqtyryldy, – delingen habarlamada.
Mınıstrliktiń habarlaýynsha, sherýshiler qalanyń ınfraqurylymyna zaqym keltirgen, atap aıtqanda, tosqaýyldar qoıǵan, parlamenttiń esikteri men baqylaý kameralaryn zaqymdap, birneshe ret órt shyqqan. Saldarynan polıtsııa qyzmetkerleriniń zańdy talaptaryna moıynsunbaǵany kóptegen sherýshiler qamaýǵa alyndy.
– Polıtsııa tártip ornatý úshin arnaıy quraldardy paıdalandy, – delingen habarlamada.
«Rustavi2» jáne «NewsGeorgia» basylymdarynyń habarlaýynsha, Tbılısı polıtsııasy kózden jas aǵyzatyn gaz, sý atqyshtar men dýbınkalardy qoldanýda. Keıbir sherýshiler arnaıy tehnıkanyń qozǵalysyn toqtatý úshin jerge jatyp alýda. Grýzııa prezıdenti Salome Zýrabıshvılı polıtsııadan sherýshilerge kúsh qoldanbaýdy ótindi.
Tbılısıden basqa Gorı, Telavı, Lagodehı, Kýtaısı, Zýgdıdı jáne Batýmı sııaqty birneshe qalada sherýler jalǵasýda.
Aıta keteıik, buǵan deıin Tbılısıde polıtsııa narazylyq bildirýshilerdi sý shashyp taratpaq bolǵanyn jazǵan edik.