Grýzııada sońǵy táýlikte 3 ret jer silkindi

TBILISI. QazAqparat – Shyǵys Grýzııada sońǵy táýlikte birden úsh ret jer silkindi. Bul týraly Ulttyq seısmıkalyq monıtorıng ortalyǵynyń saıty jazdy, dep habarlaıdy QazAqparat «Novostı-Grýzııaǵa» silteme jasap.

Jergilikti ýaqytpen 10 tamyz kúni saǵat 18:34-te Dmanısı qalasynan batysqa qaraı 24 shaqyrym qashyqtyqta kúshi 3,1 balldyq jer silkindi. 11 tamyzda 01:14-te Nınotsmında qalasynan shyǵysqa qaraı 25 shaqyrym qashyqtyqta, Sameba aýylynda 3,2 balldyq jerasty dúmpýi sezildi. Úsh mınýttan keıin 3,1 magnıtýdaly aftershok boldy.

Sońǵy aıda Grýzııada 1,2 myńnan astam zilzala tirkelgen. Olardyń basym bóligi Djavahet jotasynda, Sameba aýylynda bolǵan. Ulttyq seısmıkalyq monıtorıng ortalyǵynyń basshysy Teıa Godoladze Netgazeti basylymyna bergen suhbatynda sarapshylar bul protsesterge tańǵalmaıtynyn aıtty. Sebebi, Djavahet jotasynda janartaý ornalasqan. Gogoladzeniń pikirinshe, zertteý nátıjesine sáıkes, bul qubylys turǵyndarǵa asa qaýip tóndirmeıdi.

Grýzııa – seısmıkalyq belsendiligi orta deńgeıdegi el. Grýzııada eń qatty jer silkinisi 1991 jyly Racha jáne Imeretı (Batys Grýzııa) óńirlerinde bolǵan. Epıtsentrindegi jerasty dúmpýi 9 ballǵa jetken. Saldarynan 200 adam qaza taýyp, 46 myń úı men ónerkásip nysany qırady.