Grýzııada prezıdent saılaýynyń ekinshi týry ótedi

ASTANA. QazAqparat - Grýzııada prezıdent saılaýynyń ekinshi týry ótedi, sebebi úmitkerlerdiń bir de bireýi 50% daýys jınaı almaǵan, dep habarlaıdy QazAqparat Grýzııa OSK-ǵa silteme jasap.

Grýzııa OSK-da jarııalanǵan derekterge sáıkes, dúısenbi kúni tańerteń 99%-dan astam saılaý ýchaskelerindegi bıýlletenderdi eseptegennen keıin prezıdenttikke úmitkerlerdiń bir de bireýi 50% daýys jınaı almaǵany anyqtaldy.

Grýzııanyń ortalyq saılaý komıssııasy táýelsiz kandıdat Salome Zýrabıshvılıdiń kóp daýys jınaǵanyn atap ótti. Oǵan 38,66% nemese 615 myń saılaýshy daýys bergen. Ekinshi orynda Biryńǵaı ulttyq qozǵalys partııasynyń kandıdaty Grıgol Vashadze 37,7% daýyspen (600 myń daýys) tur.

Olar prezıdent saılaýynyń ekinshi kezeńinde kezdesedi. Saılaýdyń ekinshi kezeńi 1 jeltoqsanǵa deıin ótýi tıis.

OSK deregi boıynsha, saılaýdyń birinshi kezeńine 1,6 mıllıon saılaýshy qatysqan.

Aıta ketken jón, Grýzııa prezıdenti alty jylǵa saılanady.