Grýzııada prezıdent saılaýynyń ekinshi týry bastaldy

TBILISI. QazAqparat - Sársenbi kúni Grýzııada prezıdent saılaýynyń ekinshi kezeńinde daýys berý úshin 3,6 myńnan astam saılaý ýchaskesi ashyldy. Saılaýshylar eki kandıdattyń biri - «Grýzııa armany» basqarýshy partııasynan kandıdat Salome Zýrabıshvılı nemese «Birtutas ulttyq qozǵalys» oppozıtsııalyq partııasynyń ókili Grıgol Vashadzege daýys beredi. Bul týraly TASS agenttigi habarlady.

Ortalyq saılaý komıssııasynyń baspasóz hatshysy Anna Mıkeladze tilshilerge Grýzııada barlyq saılaý ýchaskeleri ýaqytyly ashylǵanyn, daýys berý ótip jatqanyn aıtty. Onyń sózderinshe, «daýys berý protsesi beıbit jaǵdaıda ótýde».

OSK-niń málimetinshe, 3 703 saılaý ýchaskesiniń 55-i shet memleketterde  ornalasqan. Saılaýshylar sany 3,5 mln adamnan asyp jyǵylady.

Grýzııa aýmaǵyndaǵy ýchaskeler jergilikti ýaqyt boıynsha saǵat 20:00-de jabylady. Bul rette, shetelde júrgen el azamattary jergilikti ýaqyt boıynsha saǵat 24:00-ge deıin daýys bere alady. 28 qarasha Grýzııada demalys kúni bolyp jarııalanǵan.

Aıta keteıik, 28 qazanda ótken saılaýdyń birinshi týrynda Zýrabıshvılı - 38,64 paıyz, al Vashadze37,74 paıyz daýys jınady. Konstıtýtsııadaǵy ózgeristerge sáıkes, bul Grýzııa prezıdentin sońǵy tikeleı saılaý.