Grýzııada prezıdent saılaýy bastaldy

ASTANA. KAZINFORM – Grýzııada prezıdenttik saılaýǵa arnalǵan saılaý ýchaskeleri jergilikti ýaqyt boıynsha saǵat 09:00-de (Astana ýaqytymgen 10:00) ashyldy, dep habarlaıdy Kazinform-nyń menshikti tilshisi. 

Daýys berý parlament ǵımaratynda saǵat 14:00-ge deıin jalǵasady. Jańa memleket basshysyn 300 adamnan turatyn saılaýshylar alqasy saılaıdy.

Alqa quramyna resmı túrde Grýzııa Parlamentiniń 150 depýtaty, Adjarııa Joǵarǵy Keńesiniń 21 depýtaty, Abhazııa Joǵarǵy Keńesiniń 20 ókili jáne eldiń ártúrli aımaqtarynyń mýnıtsıpaldyq bıliginiń aýdandyq sakrebýlosynyń 109 depýtaty kiredi. 

Alqanyń 300 múshesiniń 211-i – eldegi bıliktegi «Grýzın armany» partııasynyń ókilderi.

Grýzııanyń Saılaý kodeksine sáıkes saılaýǵa alqa músheleriniń jartysynan kóbi qatyssa, saılaý ótti dep sanalady. Bul rette birinshi týrda ótken kandıdat saılaný úshin alqanyń tolyq quramynyń keminde úshten ekisiniń, ıaǵnı 200 daýysyn alýy tıis. 

Daýys berý aıaqtalǵannan keıin Ortalyq saılaý komıssııasy (OSK) daýystardy sanap, alqaǵa túpkilikti qorytyndyny jarııalaıdy.

Grýzııada prezıdent 5 jyldyq merzimge saılanady. Bul laýazymǵa jalǵyz úmitker – bıliktegi «Grýzın armany – Demokratııalyq Grýzııa» partııasynyń ókili, burynǵy fýtbolshy, parlament depýtaty Mıhaıl Kavelashvılı.

Grýzııanyń qazirgi prezıdenti Salome Zýrabıshvılı bul qyzmetti 2018 jyldyń 16 jeltoqsanynan beri atqaryp keledi. Buǵan deıin ol parlament «zańsyz» bolǵandyqtan, mandatynyń aıaqtalýyna qaramastan otstavkaǵa ketpeıtinin málimdegen. 

Eldegi sońǵy prezıdent saılaýy 2018 jyly jalpyǵa birdeı, teń jáne tóte saılaý quqyǵy negizinde jasyryn daýys berý arqyly ótti. 2024 jyldan bastap tikeleı prezıdent saılaýy joıyldy.