Grýzııada koronavırýs juqtyrǵandar sany 38 boldy

TBILISI. Newsgeorgia-QazAqparat – Qazirgi ýaqytta Grýzııada jańa koronavırýs juqtyrǵan 38 adam tirkeldi. Birneshe naýqastyń jaǵdaıy aýyr, sebebi olardyń basqa da aýrýlary bar, dep málimdedi jýrnalısterge Tbılısı juqpaly aýrýlar aýrýhanasynyń bas dırektory Tengız Tsertsvadze. Bul týraly QazAqparat Newsgeorgia saıtyna silteme jasap habarlaıdy.

Tbılısı juqpaly aýrýlar aýrýhanasynda qazirgi ýaqytta 46 naýqas jatyr, onyń 30-ynda koronavırýs zerthanalyq turǵydan rastalǵan. Budan bólek, taǵy jeti naýqasta koronavırýs tabylǵan, olar eldegi basqa klınıkalarǵa ornalastyryldy. Bir naýqas jazylyp shyqqan.

«Eki naýqas aýyr halde jatyr, taǵy birneshe adamnyń densaýlyǵy nashar, olar egde jasqa kelip qalǵan jáne basqa da aýrýlary bar. Máselen, qan qysymy joǵary, júregi aýyrady nemese astmasy bar», - dedi Tbılısı juqpaly aýrýlar aýrýhanasynyń bas dırektory Tengız Tsertsvadze.

Aýrýhana dırektory qazirgi ýaqytta 11 naýqastyń pnevmonııaǵa shaldyqqanyn rastady.

«Olardyń jartysynyń jaǵdaıy ortasha aýyr dep baǵalanýda, al basqa naýqastardyń aýrýy jeńil ótýde. Kámelettik jasqa tolmaǵan naýqastardyń densaýlyǵy jaqsy emes, alaıda, olardyń indeti jeńil túrde jáne jaǵdaıy qanaǵattanarlyq», - dep málim etti T. Tsertsvadze.

Onyń málimetinshe, premerdiń sheshimi boıynsha Grýzııadaǵy tórt jetekshi klınıka naýqastardan tolyq bosatylǵan. «A josparyna» sáıkes, 440 jatyn oryn ázirlengen. Taǵy qajet bolǵan jaǵdaıda, «B jospary» aıasynda 3600 oryn daıyndalady.