Grýzııada azaly kún jarııalandy
Buǵan deıin jarylys saldarynan úsh adamnyń qaza taýyp, taǵy jeti adamnyń zardap shekkeni týraly habarlanǵan bolatyn.
Polıtsııa qurylys nemese nysandy paıdalaný kezinde qaýipsizdik erejeleriniń eki ne odan da kóp adamnyń ólimine ákep soqtyrǵan buzylýy týraly bappen qylmystyq is qozǵaǵan. Oqıǵa ornynda krımınalıst sarapshylar jumys istep jatyr.
El prezıdenti Salome Zýrabıshvılı jarylystan zardap shekkenderge em-dom jasalyp jatqan aýrýhanaǵa bardy.
«Qaıtys bolǵandardyń otbasylaryna kóńil aıtamyn. Bul asa úlken apat», - dep málimdedi ol.
Grýzııa premer-mınıstri Mamýka Bahtadze 17 qańtardy elde qaraly kún dep jarııalady.
«Barlyq memlekettik mekemelerde jáne eldiń shetelderdegi dıplomatııalyq ókildikterinde memlekettik tý tómen túsiriledi», - dep habarlady Grýzııa úkimetiniń baspasóz qyzmeti.