Grýzııa prezıdenti bolýǵa 39 adam úmitker

TBILISI. QazAqparat - 8 qyrkúıek kúni Grýzııada el prezıdenttigine kandıdatýralardy tirkeý aıaqtalady.  Búginge deıin bul laýazymǵa 39 adam úmitker retinde tirkelgen, dep habarlaıdy «QazAqparat» HAA Armenpress agenttigine silteme jasap.

Grýzııa Ortalyq saılaý komıssııasynyń aqparatynsha, qazirge deıin saılaýǵa qatysýǵa 39 adam ótinish bergen. Onyń 20-syn bastamashyl toptar, qalǵan 19-yn saıası partııalar usynǵan.

Kandıdattardy qoldaıtyn qoltańbalardy OSK-ǵa saılaýǵa kem degende 40 kún qalǵanda tapsyrý qajet. Jalpy 23 923 qoltańba (búkil saılaýshylardyń 0,75%) jınalýy tıis. OSK olardy teksergennen keıin, saılaýǵa deıin kem degende 30 kún buryn jınalǵan qoltańbalar men qujattamalardy zań talaptaryna sáıkestigin tekserip, prezıdenttikke kandıdattardy tirkeıdi.

Ázirshe tek tórt úmitker tolyq tirkeýden ótti. Olar: Mıhaıl Salýashvılı («Halyq daýysy»: Qudaı bizdiń jol salýshymyz» Ádilet ornatý odaǵy»), Zvıad Bagdavadze («Jańa Grýzııa - azamattyq tuǵyrnamasy»), Shalva Natelashvılı (Grýzııa Leıborıstik partııasy) jáne Davıd Bakradze («Eýropashyl Grýzııa - Erkindik úshin qozǵalys»).