Grýzııa ekonomıkasynyń ósý qarqyny 6,3 paıyzǵa deıin baıaýlady

ASTANA. KAZINFORM — Ekonomıkalyq ósim qarqynynyń birshama baıaýlaýyna qaramastan, Grýzııa bıylǵa belgilengen boljamdy traektorııasyn saqtap keledi. Bul týraly Georgia Today basylymy jazdy.

Aldyn ala málimet boıynsha, 2025 jyldyń maýsym aıynda Grýzııa ekonomıkasy jyldyq eseppen 6,3%-ǵa ósken. Bul kórsetkish sáýir jáne mamyr aılaryndaǵy 7,5%-dyq turaqty ósimmen salystyrǵanda tómendeý bolyp otyr.

— Jyl basynda tirkelgen joǵary ósimnen keıin mundaı baıaýlaý kútilgen edi. Birinshi toqsanda ekonomıka 9,8%-ǵa, al ekinshi toqsanda 7,1%-ǵa artty. Jyl qorytyndysy boıynsha 7,5% ósimge qol jetkizý úshin ekinshi jartyjyldyqta ortasha 6,8% ósim qajet. Bul — qalypty baıaýlaý, — dedi Galt & Taggart ınvestıtsııalyq kompanııasynyń ekonomısi Lasha Kavtaradze.

Onyń aıtýynsha, ekonomıkalyq ósimniń negizgi qozǵaýshy kúshteri — ishki tutyný belsendiliginiń joǵary bolýy jáne ınvestıtsııa kóleminiń artýy. Sondaı-aq bıznesti nesıeleý men iri memlekettik ınfraqurylymdyq jobalar da aıtarlyqtaı qoldaý kórsetip otyr. Bıyl mundaı jobalardyń jalpy kólemi JІÓ-niń shamamen 8%-yn quraıdy.

Qosymsha qun salyǵyn (QQS) tóleıtin kásiporyndardyń aınalymy ótken jyldyń maýsym aıymen salystyrǵanda 8,7%-ǵa ósip, 14,8 mlrd larıǵa ($5,47 mlrd) jetti. Degenmen, aldyńǵy aılarmen salystyrǵanda ósim qarqyny sál báseńdegeni baıqaldy.

Kavtaradzeniń pikirinshe, maýsymdaǵy 6,3% ósim de Halyqaralyq valıýta qory (HVQ) men Grýzııa Ulttyq bankiniń (GUB) buǵan deıin jasaǵan jyldyq boljam sheńberine saı keledi.

Aıta keteıik, Halyqaralyq valıýta qory 2025 jyly Grýzııa ekonomıkasy 7,2%-ǵa ósedi dep kútse, Ulttyq bank bul kórsetkishti 7,4% deńgeıinde boljaıdy.

Eske salaıyq, buǵan deıin Halyqaralyq valıýta qory Grýzııanyń ekonomıkalyq saıasatyna baǵa bergen jańartylǵan esebin jarııalaǵan bolatyn.