Grýzııa ekonomıkasy álemdik daǵdarysqa qaramastan ósip keledi
ASTANA. KAZINFORM — Halyqaralyq valıýta qory (HVQ) jańartylǵan esebin jarııalap, onda Grýzııanyń ekonomıkalyq saıasatyna jáne sońǵy jyldary qol jetkizgen áserli nátıjelerine joǵary baǵa berdi, dep habarlaıdy Kazinform agenttiginiń tilshisi.
Resmı qujatta atap ótilgendeı, álemdegi turaqsyz jaǵdaı men óńirlik syn-qaterlerge qaramastan, Grýzııa ekonomıkasy tek turaqtylyqty saqtap qana qoımaı, senimdi ósim traektorııasyna shyqqan. 2021 jyldan beri JІÓ-niń ortasha jyldyq ósimi 9%-dan asty, bul aımaqtaǵy eń joǵary kórsetkishterdiń biri. Ekonomıkalyq ósimdi ishki suranys qana emes, ınvestıtsııalardyń qarqyndy aǵymy, sondaı-aq aqparattyq tehnologııalar men kólik sektorynyń belsendi damýy da qamtamasyz etip otyr.
— Grýzııa erekshe turaqtylyq tanytyp otyr. Mundaı ósim qarqyny men turaqtylyq — saralanǵan ári jan-jaqty oılastyrylǵan saıasattyń jemisi, — delingen HVQ esebinde.
Esepke sáıkes, eldegi ınflıatsııa deńgeıi qaıtadan maqsatty mejege tústi, ulttyq valıýta — ları nyǵaıyp keledi, al memlekettik qaryz 2024 jyly JІÓ-niń 36%-yna deıin tómendegen. Sonymen qatar jan basyna shaqqandaǵy tabystyń ósýi, jumyssyzdyq pen kedeıliktiń azaıýy erekshe atalyp ótken.
Alaıda Grýzııa ekonomıkasynda áli de birqatar problema saqtalyp otyr. Olardyń qatarynda qurylymdyq jumyssyzdyqtyń joǵary deńgeıi, tabys teńsizdigi, halyqtyń kóshýi (mıgratsııa) jáne kóleńkeli eńbek syndy máseleler bar.
HVQ sarapshylary 2025 jyly Grýzııa ekonomıkasy 7,2% deńgeıinde senimdi ósim kórsetetinin, al keıingi jyldary ósim 5% shamasynda turaqtalatynyn boljaıdy. Mundaı qarqyndy saqtap qalý úshin qurylymdyq reformalardy jalǵastyrý, qarjylyq rezervterdi nyǵaıtý jáne adamı kapıtaldy damytý qajet.
Uıym áleýmettik saıasattyń mańyzdylyǵyna da toqtaldy: beıresmı jumyspen qamtýmen kúres, kóshi-qondy azaıtý, teń múmkindikter men jumyspen qamtýdy arttyrý — aldaǵy jyldarda negizgi nazar aýdarylatyn baǵyttar bolýy tıis.
Buǵan deıin habarlanǵandaı, 2025 jyldyń alǵashqy jartysynda Grýzııa halyqaralyq týrızmnen 2 mlrd AQSh dollarynan astam tabys tapqan. Bul ótken jyldyń osyndaı kezeńimen salystyrǵanda 6,2%-ǵa artyq kórsetkish.