Grekııada keme apatynan qaza tapqandar sany 80-ge jetti

AFINY. QazAqparat – Grekııa jaǵalaýynda keme apatynan qaza bolǵandar sany 80-ge jetti. Bul týraly QazAqparat Euronews-ke silteme jasap habarlaıdy.

Ion teńizinde júzdegen zańsyz mıgrant mingen balyqshylar kemesi sýǵa ketkenin buǵan deıin jazǵan bolatynbyz.

Jolaýshylardyń naqty sany áli belgisiz. Aman qalǵandardyń aıtýynsha, bortta 400-700 adam otyrǵan bolýy múmkin.

Qazir aýqymdy izdeý operatsııasy júrip jatyr. Sýdan júzden astam adam qutqaryldy.

Shekten tys adam sany mingen kemeni seısenbi kúni Frontex eýropalyq agenttigi baıqaǵan bolatyn. Sol kezde onyń jaǵdaıyna kúmán keltirilip, oǵan Grekııa jaǵalaý kúzetiniń kemesi jiberildi. Biraq, qaıyq ekıpajy kómekten bas tartyp, Italııa jaǵalaýyna baratynyn málim etken.

Sársenbi tańerteń keme aýdaryldy. Qutqarýshylardyń aıtýynsha, tiri qalǵandardyń kóp ekenin aıtý qıyn. Sýdan shyǵarylǵan jolaýshylardyń qutqarý keýdeshesi bolmaǵan.