Grekııa jaǵalaýynda 400-den astam mıgrant qutqaryldy
ASTANA. KAZINFORM – Grekııa bıligi beısenbi kúni Gavdos aralynyń ońtústiginde ashyq teńizde júrgen 352 shetel azamattaryn jaǵaǵa aman-esen jetkizý úshin aýqymdy qutqarý operatsııasyn júrgizdi, dep jazdy Euronews.
Operatsııaǵa Grekııanyń jaǵalaý kúzeti men bul aýdanda júrgen tórt kommertsııalyq keme jumyldyryldy. Qutqarý jumystary Іzdeý jáne qutqarý jónindegi biryńǵaı úılestirý ortalyǵynyń (EKSED) qoldaýymen ótti.
Alǵashqy málimetterge súıensek, mıgranttar mingen aǵash qaıyqty aldymen Frontex kemesi baıqaǵan. Keıin jaǵalaý kúzeti qyzmeti men basqa da kemeler kómek kórsetip, adamdardy qaýipsiz túrde jetkizdi.
Qutqarylǵan azamattar Paleohora portyna jetkizilip, olarǵa qajetti kómek kórsetildi. Qazirgi ýaqytta olardyń tirkeý jáne jeke basyn anyqtaý rásimderi júrip jatyr.
Grek BAQ-tarynyń habarlaýynsha, Frontex ushqyshsyz ushaǵy Gavdos mańynan taǵy bir qaıyqta otyrǵan 73 adamdy anyqtaǵan. Olar Karave portyna jetkizilip, keıin Krıtke jóneltiledi.
Grekııa jaǵalaý kúzetiniń mamyr aıyndaǵy statıstıkasy boıynsha, 61 izdeý-qutqarý operatsııasy barysynda 2341 adam qutqarylǵan, 76 adam saýdager (adam trafıgimen aınalysýshy) retinde ustalǵan.
Eske sala keteıik, 2023 jyly mıgranttar mingen keme apatqa ushyraýyna baılanysty jaǵalaý kúzetiniń 17 kúzetshisine aıyp taǵylǵan edi. Bul apat sońǵy on jyldaǵy Jerorta teńizindegi eń kóp adam shyǵynyna ákelgen kóshi-qon apaty retinde tarıhta qaldy.