Grant konkýrsy: talapkerlerdiń kóbi qandaı mamandyqty tańdaǵan

ASTANA. KAZINFORM – 20 shildege deıin bilim berý granttaryn taǵaıyndaý konkýrsyna 100 myńǵa jýyq ótinish kelip tústi. Bul týraly QR Ǵylym jáne joǵary bilim mınıstrligi málim etti.

Talapkerlerdiń basym bóligi qujattaryn úsh respýblıkalyq mańyzy bar qalanyń joǵary oqý oryndaryna tapsyryp jatyr: Almaty (38 myń), Astana (20 myń) jáne Shymkent (6 myń).

Talapkerlerdiń tańdaýy ishinde eń suranysqa ıe baǵyttar qatarynda «Pedagogıkalyq ǵylymdar» (25 myń), «Injenerlik, óńdeý jáne qurylys salalary» (16 myń) jáne «Aqparattyq-kommýnıkatsııalyq tehnologııalar» (13 myń) bolyp otyr.

Bilim berý baǵdarlamalarynyń tobyna keletin bolsaq, eń kóp ótinish «Aqparattyq tehnologııalar» - 11 myń. Ary qaraı «Dene shynyqtyrý muǵalimderin daıarlaý» - 5 myń ótinish kelip túsken. Úshinshi orynda «Shet tili muǵalimderin daıarlaý», ony 4 myń talapker tańdaǵan.

«Talapkerlerdiń nazaryna, grant konkýrsyna ótinishter qabyldaý barlyq óńir talapkerleri úshin 24 shildege deıin jalǵasatyndyǵyn habarlaımyz. Qujattardy qabyldaý eGov arqyly onlaın formatta nemese JOO-lardyń qabyldaý komıssııalary arqyly oflaın formatta júzege asyrylady. Sondaı-aq, JOO-da vırtýaldy qabyldaý komıssııasy jumys isteıdi. Qujattardy kez kelgen JOO (ornalasqan jeri boıynsha) arqyly tapsyrýǵa bolady», - delingen mınıstrlik habarlamasynda.