Gonkongtegi alapat órttiń shyǵý sebebi týraly boljam jasaldy
ASTANA. KAZINFORM — Gonkongtegi turǵyn úı keshenindegi apatty órttiń sebebi retinde bambýktan jasalǵan qurylysqa tastalǵan temekiden bolýy múmkin degen boljam bar, dep habarlaıdy BILD.
Alǵashqy boljamdarǵa sáıkes, fotosýretterde úılerdiń qabyrǵalary boıynda birneshe bambýktan jasalǵan qurylys satysy órtenip, odan janǵan zattar qulaǵany kórinedi. Sarapshylar órttiń taralýyna bambýktyń, Gonkongte qurylys satysyna jıi qoldanylatyn materıaldyń yqpaly bar-joǵyn zerttep jatyr.
Kıko Ma Kanadada turady, biraq onyń Wang Fuk Court turǵyn úı kesheninde páteri bar. Onyń aıtýynsha, bir jyldan astam ýaqyt jóndeý jumystaryna baılanysty páter terezeleri penopolıstırolmen jabylǵan, al bılik pikirinshe, bul da órttiń taralýyn jyldamdatqan. Kıko keıde terezeler janynan shylym qaldyqtaryn taýyp otyrǵan, ony qurylysshylar tastaǵan dep sanaıdy.
— Adamdar únemi órt shyqsa ne bolatynyn suraıtyn. Barlyǵy qatty ýaıymdady, — deıdi ol.
Turǵyn úı keshenindegi basqa da problemalar kóp. Keıbir órt dabyl sıgnalızatsııalary jóndeý kezinde ajyratylǵan, sebebi qurylysshylar ǵımaratqa kirý jáne shyǵý úshin órt satysyn únemi paıdalanǵan.
South China Morning Post basylymyna óz atyn Tan dep kórsetken kýáger, onyń jáne kórshileriniń qurylys satysyna ornatylǵan jelilerge qatysty alańdaýshylyqtary bolǵanyn aıtty. Órt sóndirýshilerdiń pikirinshe, qorǵanysh plastıkalyq jabyndar kádimgi materıaldarǵa qaraǵanda áldeqaıda tez órtengen.
Gonkong polıtsııasy ǵımarattardy jóndeýmen aınalysqan qurylys kompanııasynyń eki jetekshisi men bir keńesshisin abaısyzda kisi óltirý aıybymen qamaýǵa aldy.
— Bizde kompanııanyń jaýapty qyzmetkerleri salǵyrt áreket etken dep esepteýge negiz bar. Órt baqylaýdan shyǵyp ketip, saldarynan kóptegen adam qaza tapty, — dedi Gonkong polıtsııasynyń qyzmetkeri Eılın Chýn.
Aıta ketelik Gonkongtaǵy órtten qaza tapqandar sany 55-ke jetken edi.
Eske salsaq, budan buryn 13 adam qaza taýyp, 16 adam aýyr jaraqattar men kúıik alǵany habarlanǵan edi. Gonkongtaǵy turǵyn úı kesheninde tutanǵan órtpen kúresý úshin 767 órt sóndirýshi, 400 polıtsııa qyzmetkeri, 128 órt tehnıkasy jáne 57 jedel járdem kóligi jumyldyryldy.