Gonkongtaǵy alapat órt: qurbandar sany 128-ge jetti

ASTANA. KAZINFORM – Gonkongta sońǵy jetpis jyldaǵy eń iri órt oqshaýlandy. 128 adamnyń qaza tapqany rastaldy, olardyń arasynda bir órt sóndirýshi bar, dep habarlaıdy Reuters.

Qaýipsizdik qyzmetiniń basshysy Krıs Tannyń aıtýynsha, aman qalǵandardy izdeý operatsııasy aıaqtalǵan. Shamamen 200 adam habar-osharsyz ketkender qatarynda, keminde 79 turǵyn jaraqat alǵan.

— Qazir bizdiń basty mindetimiz ǵımarat ishindegi temperatýrany tómendetý. Sarapshylar jaǵdaıdyń qaýipsiz ekenin rastaǵannan keıin, polıtsııa dálel jınaýǵa jáne tergeýdi jalǵastyrýǵa kirisedi, — dedi ol.

Brıfıng kezinde bılik ókilderi zaqymdanǵan ǵımarattardaǵy órt dabyldary durys jumys istemegenin málimdedi. Qaza tapqandardyń bir bóligi áli sáıkestendirilmegen.

Qutqarý jumystaryna shamamen 1 myń polıtsııa qyzmetkeri tartyldy. Kúıregen ǵımarattardan 108 adamnyń denesi tabylǵan. Taǵy tórt adam alǵan jaraqatynan aýrýhanada qaıtys boldy.

Resmı aqparatqa saı, órtti sóndirý kezinde 12 órt sóndirýshi zardap shekken, olardyń biri aýyr halde jatyr.

Buǵan deıin ondaǵan adam órtke oranǵan turǵyn kesheninen shyǵa almaı qalǵany habarlanǵan edi.

Aldyn ala boljam boıynsha, Gonkongtaǵy turǵyn úı keshenindegi apatqa bambýktan jasalǵan qurylys baǵanalaryna tastalǵan shylym sebep bolýy múmkin.