Gondýras 20 myń oryndy túrme salýdy josparlap otyr

ASTANA. KAZINFORM - Gondýras prezıdenti 20 000 oryndy jańa «mega-túrme» salynatynyn habarlady. Bul shara – úkimettiń bandalyq zorlyq-zombylyqpen kúresýdiń jáne kópten beri talqylanyp kelgen túrme júıesin qaıta qurýdyń bir baǵyty.

Prezıdent Ksıomara Kastro senbi kúni tańerteń ulttyq teledıdar arqyly sóılegen sózinde tótenshe sharalar tizimin jarııalady.

Onda uıymdasqan qylmysqa qarsy kúreste Qarýly Kúshterdiń rólin kúsheıtý, esirtki tasymaldaýshylarmen kúresý merzimderin retteý jumystary aıtyldy.

Kastronyń «mega-túrme» salý jónindegi ıdeıasy kórshi Salvadordaǵy prezıdent Naıb Býkeleniń áreketine jaýap sııaqty qabyldanyp jatyr.

Aıta keteıik, Salvadorda Latyn Amerıkasyndaǵy eń úlken túrme salynǵan bolatyn. Oǵan 40 000 qylmyskerdi qamaýǵa bolady.

Kastro óz sózinde Gondýrastyń qaýipsizdik kúshteri eldiń barlyq aımaǵynda beleń alǵan toptyq zorlyq-zombylyq, esirtki saýdasy, aqshany jylystatý jáne basqa da qylmystardy azaıtýǵa barynsha kúsh salý kerek ekenin atap ótti.

Osylaısha Olancho aýyldyq provıntsııasynyń mańynda salynatyn túrmege eń qaýipti sanalatyn 20 myń qylmyskerdi toǵytý kózdelip otyr.

Esterińizge salsaq, buǵan deıin Gondýrastaǵy áıelder túrmesinde bolǵan tártipsizdikter saldarynan 41 adam qaza tapqanyn jazǵan edik.

Al Gondýrastyń burynǵy prezıdenti Hýan Orlando Ernandes Nıý-Iorkte esirtki satýshylarmen sóz baılasqany úshin kináli dep tanylǵan edi.