Qazaqstanda balalardyń erte damýy úshin qyzmetterge teń múmkindik beretin qujat qabyldandy
ASTANA. KAZINFORM - Bul týraly QR Oqý-aǵartý mınıstrliginiń ıÝNISEF-pen seriktestikte birlesip uıymdastyrýymen «Qazaqstandaǵy árbir bala úshin úzdik bastama» taqyrybynda ótken halyqaralyq konferentsııa barysynda málim boldy.
Іs-sharaǵa Oqý-aǵartý mınıstri Juldyz Súleımenova, Densaýlyq saqtaý mınıstri Aqmaral Álnazarova, Eńbek jáne halyqty áleýmettik qorǵaý mınıstri Svetlana Jaqypova, Dúnıejúzilik banktiń, memlekettik qurylymdar men qoǵamdyq uıymdardyń ókilderi, sondaı-aq Aýstralııa, Irlandııa, Túrkııa, Ázerbaıjan, Moldova jáne Ulybrıtanııadan kelgen halyqaralyq sarapshylar men zertteýshiler qatysty.
Konferentsııada 2025–2027 jyldarǵa arnalǵan «Sátti bastaý» vedomstvoaralyq keshendi jospary men Ulttyq úndeý qabyldandy.
Bul qujattar barlyq bala úshin erte damý qyzmetterine teń qoljetimdilikti qamtamasyz etýge, densaýlyq saqtaý, bilim berý, áleýmettik qorǵaý boıynsha vedomstvoaralyq yntymaqtastyqty nyǵaıtýǵa, ata-analardy tsıfrlyq jáne qoǵamdyq servıster arqyly qoldaýdy damytýǵa, pedagog-mamandardyń biliktiligin arttyrýǵa, salaǵa jańa tehnologııalar men modelderdi engizýge baǵyttalǵan naqty sharalardy qamtıdy.
- Qazaqstanda Memleket basshysy Qasym-Jomart Toqaevtyń bastamasymen 2-6 jas aralyǵyndaǵy balalardy mektepke deıingi tárbıemen jáne oqytýmen qamtýǵa, balany erte damytýdyń sapaly júıesin qalyptastyrýǵa erekshe mán berilip otyr. «Sátti bastaý» qujatynda Qazaqstannyń ár balaǵa týǵan sátinen bastap teń múmkindik pen damýǵa jol ashatyn qoǵam qurý jónindegi strategııalyq ustanym aıqyn kórinis tapqan, - dep atap ótti Oqý-aǵartý mınıstri Juldyz Súleımenova.
Qazaqstan ıÝNISEF jáne ıÝNESKO-men tyǵyz yntymaqtastyqta jumys istep, mektepke deıingi tárbıeleý men oqytýdy halyqaralyq standarttarǵa sáıkestendirip jatyr. 2021–2023 jyldary júrgizilgen zertteýler nátıjesinde memlekettik standart pen úlgilik oqý baǵdarlamalary jańartylyp, erte damý qyzmetterin jetildirýge baǵyttalǵan jańa modelder engizildi.
- Búginde elde 3–6 jas aralyǵyndaǵy balalardy mektepke deıingi tárbıemen qamtý deńgeıi 98,5 paıyzǵa jetti. 2023 jyldan beri 171 myń jańa oryn ashyldy, 2027 jylǵa deıin taǵy shamamen 130 myń oryn iske qosylady, - delingen habarlamada.
Osyǵan deıin oqýshymen birge muǵalimniń de bilim deńgeıin baǵalaıtyn platforma paıda bolǵany týraly jazdyq.